20 Yanvar faciəsinin 32-ci ildönümünə həsr olun­muş anım tədbirində BSU-nun rektoru səlahiyyətlərini icra edən siyasi elmlər üzrə fəlsəfə doktoru Anar Nağıyev bildirib ki, gənc nəsil 20 Yanvar faciəsini, bütövlükdə həmin dövrdə keçmiş Sovet İttifaqında baş vermiş hadisələri dərindən öyrənməlidir. 1988-ci ildən başlayaraq öz müstəqilliyinə doğru gedən Azərbaycan xalqına qarşı ciddi təhdidlər yaranmışdı.

Nəticədə 1990-cı il yan­varın 19-dan – 20-nə keçən gecə Bakıya sovet qoşunu yeridildi. Lakin Azərbaycan vətəndaşlarını kütləvi şəkildə gülləbaran edən sovet imperi­yasının rəhbərliyi xalqın milli-azadlıq hərəkatını çökdürə bilmədi.

A.Nağıyev bildirmişdir ki, 20 Yanvar faciəsinə ilk dəfə ümummilli liderimiz Heydər Əliyev hüquqi-siyasi qiymət verdi. Yanvarın 21-də Azərbaycanın Moskvadakı Daimi Nümayəndəliyinə gələn və dəhşətli qətliamı kəskin pisləyən bəyanatla çıxış edən ulu öndər bununla həmişə öz doğma xalqı ilə birgə oldu­ğunu sübut etdi. Xalqımızın milli-azadlıq hərəkatının mühüm mərhələsi olan 20 Yanvar faciəsi Azərbaycanın müstəqilliyə qovuşmasın­da müstəsna rol oynadı. Ulu öndərin təşəbbüsü ilə 1994-cü il martın 29-da Milli Məclisdə 20 Yanvar faciəsinə dolğun hüquqi-siya­si qiymət verildi. Azərbaycan Respublikasının Prezidenti, müzəffər Ali Baş Komandan İlham Əliyevin rəhbərliyi ilə Vətən müharibəsində qaza­nılmış şanlı Zəfərlə bütün şəhidlərimizin qisası alındı.

Universitetin tərbiyə işləri üzrə prorektoru, dosent Xanım Sultanova 20 Yanvar faciəsinin səbəb və nəticələri barədə fikirlərini bölüşdü.

Sonra “20 Yanvara aparan yol” mövzusunda məruzə ilə çıxış edən Elmi-tədqiqat layihələri laboratoriyasının azərbaycanşünaslıq və slavis­tika bölməsinin müdiri, dosent, Qarabağ müharibəsi veteranı Sadir Məmmədov həmin hadisələrin canlı şahidi kimi faciə ilə bağlı faktları, statistik məlumatları diqqətə çatdırdı.

O, xüsusi olaraq vur­ğulamışdır ki, 20 Yanvar qırğını nə qədər faciəli olsa da, Azərbaycan xalqının iradəsini, milli azadlıq uğ­runda mübarizə əzmini qıra bilmədi. O, xalqımızın tarixinə şərəf və qəhrəmanlıq səhifəsi kimi yazıldı.

Daha sonra Humanitar və sosial elmlər fakültəsinin tələbəsi Xanım Gülbalayeva “Qanlı Yanvar şəhidlərini unutmarıq!”, həmin fakültənin tələbəsi Günel Məmmədova “İlham və Fərizə dastanı” adlı videosüjet təqdim etdilər. BSU-nun Məktəb-Lisey Kompleksinin şagirdləri isə 20 Yanvar faciəsini əks etdirən şeir və mahnılar səsləndirdilər.

M.MÜKƏRRƏMOĞLU,

“Xalq qəzeti”