Təhsil naziri Emin Əmrullayev "20 Yanvar faciəsinin otuz ikinci ildönümü ilə bağlı Təhsil Nazirliyinin Tədbirlər Planı"nın təsdiq edilməsi haqqında əmr imzalayıb.

Əmrə əsasən, yanvarın 19-da ali, orta ixtisas, peşə və ümumi təhsil müəssisələrində 20 Yanvar faciəsinin 32-ci ildönümünə həsr olunan xüsusi dərslər keçiriləcək.

Əmrdə həmçinin təhsil müəssisələrində 20 Yanvar faciəsinin ildönümünə həsr olunmuş tədbirlərin, konfransların, seminarların, kitab, foto və rəsm sərgilərinin, ədəbi-bədii kompozisiyaların təşkil edilməsi tapşırılıb.

Əmrin icrasına nəzarət təhsil nazirinin müavini Firudin Qurbanova həvalə olunub.