BMT-nin Baş katibi Antonio Quterreş dünyanı yeni pandemiyalara hazırlaşmağa çağırıb. BBC-nin yaydığı məlumata görə, o, qeyd edib ki, hazırkı pandemiya bəşəriyyət üçün sonuncu olmayacaq, yenilərinin yaranmasına hazırlaşmaq lazımdır.

A.Quterreş deyib: “Koro­navirus bəşəriyyətin üzləşdiyi son pandemiya olmayacaq. Mövcud sağlamlıq böhranını həll edərkən, növbəti pan­demiyaya hazırlaşmalıyıq. Beynəlxalq Epidemiyaya Qarşı Hazırlıq Günündə gəlin bu məsələyə layiq olduğu diqqəti və sərmayəni göstərək”.

Qeyd edilir ki, BMT Baş Assambleyası ötən il epide­miyaların qarşısının alınma­sı, hazırlığın artırılması və onlarla mübarizədə səylərin birləşdirilməsi probleminə diqqəti cəlb etmək məqsədilə Beynəlxalq Epidemiyaya Qarşı Hazırlıq Gününün təsis edilməsi haqqında qətnamə qəbul edib. Dekabrın 27-si Beynəlxalq Epidemiyaya Qarşı Hazırlıq Günü kimi qeyd olunur.

Dünyada koronaviru­sa yoluxanların sayı 280 milyona çatır. Koronavirusa yoluxma üzrə ilk yerləri ABŞ, Hindistan, Braziliya və digər ölkələr bölüşür.

Xatırladaq ki, koronavirus 2019-cu ilin dekabrında Çinin Uhan şəhərində yayılmağa başlayıb. Ümumdünya Səhiyyə Təşkilatı 2020-ci il fevralın 11-də infeksiyanın adını COVID-19 qoyub, mar­tın 11-də isə koronavirusu pandemiya elan edib.

Rövşən TOĞRUL, “Xalq qəzeti”