Ürəyi Azərbaycanla döyünən hər bir vətənpərvər insan Vətənin ərazi bütövlüyü uğrunda hərbi əməliyyatlar nəticəsində şəhid olmuş hərbçilərimizin ailələrinə və yaralılara kömək etmək imkanı axtarır. Bu məqsədlə 2020-ci ilin sonunda YAŞAT Fondu yaradılıb. Ötən müddət ərzində qurumun fəaliyyəti, cari layihələri və gələcək planları barədə məlumat almaq üçün YAŞAT Fondunun rəhbəri, Qarabağ qazisi Elvin Hüseynovla görüşdük.

– YAŞAT Fondunun iki ya­şının tamam olmasına az qa­lır. Ötən müddət ərzində fon­dun keçdiyi yola qısa nəzər yetirmək oxucularımız üçün maraqlı olardı.

– YAŞAT Fondu Azərbaycan Prezidenti cənab İlham Əliyevin 8 dekabr 2020-ci il tarixli fərmanı əsasında yaradılıb. Bundan sonra dərhal qurumun strukturu forma­laşdırıldı və 69 qrup təsis edildi. Qruplardan biri təcili müraciətlərin olduğu yerə yönləndirildi, 68-i isə regionlarda fəaliyyət göstərir. Fondun fəaliyyəti, əsasən, dörd istiqaməti əhatə edir. Bunlar məişət şəraitinin yaxşılaşdırıl­masına, istehlak kreditlərinin ödənilməsinə, təhsil və tibb məsələlərinə aid istiqamətlərdir. Şəhid ailə üzvlərinin və müharibə əlillərinin sadaladığım istiqamətlər üzrə fonddan dəstək almaq hüquqları var.

– Fondun büdcəsi ianələrdən formalaşır. Ötən müddət ərzində digər mənbələrin formalaşdırılması istiqamətində hansı addımlar atılıb?

– YAŞAT Fondu haqqında fərmanda da göstərilib ki, quru­mun büdcəsi könüllü ianələrdən formalaşır. Fiziki və hüquqi şəxslər tərəfindən fonda ianələr daxil olur. İanələri müxtəlif üsullarla (SMS, onlayn, bank vasitəsilə və s.) həyata keçirmək mümkündür. Fondun bir neçə xarici valyutada bank hesabı var və dünyanın müxtəlif ölkələrində yaşayan azərbaycanlılar rahat şəkildə ianə əldə edə bilirlər. Ona görə də biz həmişə deyirik ki, YA­ŞAT ən böyük həmrəylik platfor­malarından biridir.

Yazıçılar, müğənnilər, rəssamlar fəaliyyətlərindən əldə etdikləri gəlirdən fonda ianələr ediblər. Bilirsiniz ki, regionlar­da fəaliyyət göstərən ASAN xidmətlər, əsasən, tələbələrdən ibarət könüllüləri cəlb edirlər. Bu yaxınlarda həmin könüllülər tullantılardan sənət əsərləri ha­zırladılar və onların regionlarda satışını təşkil etdilər. Bu satışdan əldə olunan gəlir YAŞAT Fondu­na ianə olunmuşdu. Vətənpərvər gənclərimiz ilk dəfə qazandıq­ları gəliri könüllü şəkildə ianə etmişdilər.

– Fonda edilən ianələrin coğrafiyasını açıqlaya bilərsinizmi?

– 2021-ci ildə marafon təşkil etmişdik. 29 aprel tarixindən start verilən marafon Azərbaycan Respublikasının Diasporla İş üzrə Dövlət Komitəsinin və YA­ŞAT Fondunun təşəbbüsü, Azərbaycan Diasporuna Dəstək Fondunun təşkilatçılığı ilə re­allaşdırılmışdı. “Qələbəni bizə yaşadanları birlikdə yaşadaq” şüarı altında keçirilən marafo­nun məqsədi yaralananlara və şəhidlərimizin ailələrinə dəstək üçün dünya azərbaycanlılarını dəmir yumruq ətrafında birləşdirmək olmuşdur. Xaricdən, diaspor nümayəndələrimiz sı­rasından ən çox ianə edən ölkələrin ilk beşliyində müvafiq olaraq Türkiyə, Ukrayna, Rusi­ya, Böyük Britaniya, İsrail yer almışdır. Azərbaycan diasporu tarixində ilk dəfə keçirilən mara­fonda 63 ölkədən soydaşlarımız, Azərbaycana dost insanlar, eləcə də ölkəmizdəki yerli icmaların üzvləri iştirak etmişlər.

– Sirr deyilsə, ən böyük ianəçilər hansılardır?

– Əlbəttə, şəffaflığın təmin edilməsi məqsədilə rəsmi portalı­mız fəaliyyət göstərir (yashat.gov.az) və bu saytdakı məlumatlar hər gün yenilənir. Bugünədək fonda ən böyük ianəni edən şirkət ”GESCO” ASC-dir. Böyük məbləğdə ianə etmiş şirkətlər arasında “Faktor Qrup” QSC-ni də göstərmək olar. Fonda ianə et­miş fiziki və hüquqi şəxslərin ad­ları portalda yerləşdirilib və ma­raqlananlar həmin məlumatlarla tanış ola bilərlər.

– İndiyədək fond nə qədər şəxsi himayə edib?

– Bu günə qədər YAŞAT Fon­du 13 827 şəxsin 31400-dən çox müraciətini öhdəsinə götürüb. Yəni, burada bir şəxsin iki-üç müraciətindən söhbət gedə bilər. Buraya həm şəhid ailəsinin üzvləri və həm də müharibə əlilləri daxil­dir. Qeyd edim ki, müraciətlərin hamısı həll edilir. Müraciətlər hər gün daxil olur, rəqəmlər günün sonunda yenilənir və rəsmi sayt­da öz əksini tapır.

– Fondun köməyi ilə xaricdə müalicə olunmağa göndərilən qazilər də az deyil...

– YAŞAT dövlətin sosial sahədə həyata keçirdiyi tədbirlərə əlavə dəstək vermək üçün ya­radılıb. Bu nə anlama gəlir? Azərbaycanın hər bir vətəndaşı icbari tibbi sığortalı hesab edilir. İcbari tibbi sığortanın Xidmətlər zərfinə daxil olan xidmətlərin sayı 2550-dir. Xidmətlər zərfində ol­mayan müalicələri YAŞAT Fondu ölkə daxilində edə bilir. Bununla yanaşı, ölkə daxilində müalicəsi mümkün olmayan xəstələrlə bağlı müvafiq səhiyyə təşkilatının rəyinə uyğun addımlar atılır. Yəni, səhiyyə qurumu rəsmi rəy versə ki, konkret xəstəliyin müalicəsi ölkə daxilində müm­kün deyil, o zaman YAŞAT müalicənin xarici ölkədə aparıl­masını həyata keçirir. Bu günə qədər 183 şəxs müalicə üçün xarici ölkəyə göndərilib, onlardan 176 nəfəri bizim yaralılarımız, qazilərimiz, 7 nəfər isə şəhid ailəsinin üzvləridir. Hazırda 25 nəfərin müalicəsi Türkiyədə da­vam etdirilir, onlardan 23 nəfəri qazi, 2 nəfəri isə şəhid ailəsinin üzvüdür.

– Sentyabrın 12-dən 13-nə geçən gecə Ermənistan silahlı qüvvələrinin növbəti təxribatı nəticəsində şəhid verdik, ya­ralananlarımız oldu. Fond şəhid ailələrinə və yaralanmış hərbçilərimizə kömək etmək üçün hansı addımları atıb?

– Allah şəhidlərimizə rəhmət eləsin, qazilərimizə də tezliklə sağlamlıqlarına qovuşmalarını arzulayırıq. Yaralı hərbçilərimizlə görüş keçirdik, YAŞAT Fondunun subyekti hesab edilən müraciətlər qeydə alındı. Eyni zamanda, şəhid olmuş hərbçilərimizin ailələri ziyarət edildi və onların müraciətləri götürüldü. Hazırda 14 şəhid ailə üzvünün müraciəti qeydə alınıb, ödənişlər həyata keçirilib. Digər müraciətlər də təhlil olunur.

İki il ərzində fondumuz san­ballı layihələr həyata keçirib. Müharibədən sonra 102 şəhid övladımız dünyaya gəldi, onların ilkin xərclərini ödədik. Analarının adlarına açılmış bank hesabla­rına 1000 manat, övladlarının hesablarına 5000 manatlıq de­pozit yerləşdirdik. Bu vəsait artan faizlə bank hesabına qoyulub və həmin körpələr müstəqil həyata qədəm qoyanda istifadə edə biləcəklər. Layihələr çoxdur, an­caq bu layihələri həyata keçməsi üçün davamlı ianələr olmalıdır. Son iki ildə keçirilən layihələri qarşıdakı illərdə də reallaşdırma­ğı düşünürük. Həmin layihələrin ənənə halını almasını istəyirik.

Müsahibəni apardı:Səbuhi MƏMMƏDOV,

Elşən AĞALAR (foto)

“Xalq qəzeti”