Rusiya Prezidenti: Finlandiya və İsveçin NATO-ya daxil olması bizə təhlükə yaratmır

XARİCİ XƏBƏRLƏR
30 İyun
23:47
Rusiya Prezidenti Vladimir Putin Aşqabadda Xəzəryanı dövlətlərin liderlərinin 6-cı sammitinin başa çatmasından sonra jurnalistlərin suallarına cavab verərkən bəyan edib ki, Finlandiya və İsveçin NATO-ya daxil olması Rusiya üçün birbaşa təhlükə yaratmır. Məlumatı “Anadolu” yayıb.

Putin bildirib: “Bizim Finlandiya və İsveçlə problemimiz yoxdur, onların NATO-ya daxil olması birbaşa təhlükə yarat­mır. Onlar NATO-ya daxil olmaq istəyirlər, buyur­sunlar. Ancaq bu regionun ərazisində hərbi strukturun genişləndirilməsi, təbii ki, bizdən cavab reaksiyası tələb edir. Bu ölkələr aydın və dəqiq anlamalıdırlar ki, əvvəllər onlar üçün heç bir təhlükə yox idi, indi isə orada hərbi kontingent və infrastruktur yerləşdirilərsə, biz də eynən cavab verməyə məcbur olacağıq və bizə təhlükə törədən əraziyə təhlükə yaradaca­ğıq”.

Prezident qeyd edib ki, Rusiyanın Ukrayna ilə problemi var: “Ukrayna ilə bağlı vəziyyət tamam baş­qadır. Finlandiya və İsveçlə vəziyyət belə deyil. Bu, tamam başqa vəziyyətdir”.

Rusiya Prezidentinin sözlərinə görə, NATO soyuq müharibə dövrünün qalığı­dır: “NATO ABŞ-a lazımdır ki, özünün xarici siyasət aləti kimi yol yoldaşlarını nəzarəti altında saxlasın”.

Qeyd edək ki, iyunun 29-da NATO ölkələrinin liderləri İsveç və Finlandiya­nın alyansa dəvət olunması barədə qərar qəbul ediblər və bu ölkələrin bloka üzvlü­yü haqda protokolu razılaş­dırıblar. Təşkilatın Madrid sammitinin bununla bağlı yekun bəyannaməsində bil­dirilir: “Bu gün biz Finlandiya və İsveçi NATO üzvlüyünə dəvət etdik. Finlandiya və İsveçin iştirakı bu ölkələri təhlükəsiz, NATO-nu güclü, Avroatlantik regionu da təhlükəsiz edəcək. Finlandi­ya və İsveçin təhlükəsizliyi alyans üçün birbaşa əhəmiyyət kəsb edir”.

Sənəddə həm də sammit ərəfəsində Türkiyə, Fin­landiya və İsveç arasında üçtərəfli memorandumun imzalanması alqışlanır.

Paşa ƏMİRCANOV,

“Xalq qəzeti”

XARİCİ XƏBƏRLƏR bölməsi