NATO-nun Baş katibi Yens Stoltenberq dünən Madriddə ke­çirdiyi mətbuat konfransında de­yib ki, ehtiyac olduğu müddətdə Ukrayna bizə arxalana bilər. Belə ki, Ukraynaya hərbi və maliyyə dəstəyi davam edəcək. Məlumatı “Euronews” agentliyi yayıb.

O bildirib ki, Rusiya Ukraynaya müharibə elan etməklə Avropada sülhü pozub: “Biz İkinci Dünya müharibəsindən sonra ən böyük təhlükəsizlik böhranı ilə üzləşdik”.

Baş katib Ukrayna Prezi­dentinin liderliyi və cəsarətini yüksək qiymətləndirib. “Mən şadam ki, bu gün Prezident Zelenski bu sammitə qoşul­du. Bizim, NATO-nun mesajı aydındır: Ukrayna ehtiyac olduğu müddətdə bizə ar­xalana bilər. Biz Ukraynaya əsas hərbi və maliyyə dəstəyi verməyə davam edəcəyik. Bu gün NATO müttəfiqləri Uk­rayna üçün hərtərəfli dəstək planı barədə razılığa gələrək bu ölkəyə dəstəklərini gücləndirəcəklər”.

Baş katib açıqlayıb ki, Ukraynaya göstəriləcək yardımlar siyahısına təhlükəsiz kommunikasiya, yanacaq, tibbi ləvazimat, bədən zirehi, kimyəvi bioloji silahlar, minalarla mübarizə üçün ləvazimatlar, eləcə də yüzlərlə daşına bilən antidron sistemləri daxildir.

NATO-nun Baş kati­bi həmçinin qeyd edib ki, uzunmüddətli strategiya ilə bağlı alyans rəhbərliyi Ukraynanın sovet silahları sistemindən müasir NATO sisteminə keçməsi üçün yardımları davam edəcək. Bu, bizim Ukraynanın müstəqil, suveren gələcəyinə öhdəliyimizin nümunəsidir və bu öhdəlik sarsılmazdır. Müstəqil və suveren Ukrayna Avroatlantik regionunda sa­bitlik üçün həyati əhəmiyyət daşıyır”, - deyə Stoltenberq sonda vurğulayıb.

Mahmud QƏRİBOV,

“Xalq qəzeti”