Xarici xəbərlər

XARİCİ XƏBƏRLƏR
3 İyun
07:32

Yeni texnologiya hazırlanıb

Çin Hərbi Hava Qüvvələri xaricdən gələn istənilən raket təhdidlərini 15 saniyəyə aşkar edə biləcək. Bunu Çin Hərbi Hava Qüvvələrinin Erkən Xəbərdarlıq Akade­miyasının tədqiqatçıları açıqlayıb. Alimlər səsdən beşqat sürətli hipersəs raketlərinin yaxınlaşmasını və gedişatını təxmin edə bilən süni intellektə əsaslanan texnologiya ha­zırladıqlarını bildiriblər. Qeyd edək ki, “Journal of Astronau­tics” jurnalında bu barədə məqalə də dərc edilib.

Xəbəri “Sinxua” verib.

Səudiyyə Ərəbistanı

Göydələnlər inşa ediləcək

Səudiyyə Ərəbistanında “NEOM” meqapolis layihəsi çərçivəsində dünyanın ən böyük binaları inşa ediləcək. Bildirilir ki, hazırda hündürlüyü təxminən 500 metr olan və üfüqi olaraq böyük əraziyə uzanan iki göydələnin layihələri başa çatıb. Göydələnlər Qırmızı dəniz sahilindən səhraya doğru uzanacaq və burada yaşayış, pərakəndə satış və ofis sahələri olacaq.

Bundan başqa, Krallıq hökuməti tezliklə hazırda dün­yanın ən hündür, Dubaydakı 828 metr hündürlüyündə olan “Bürc Xəlifə”nin rekordunu təzələyən binaya – tikintisi başa çatmaqda olan Ciddə Qülləsinə malik olacaq.

Xəbəri “Al Arabia” verib.

Belçika

İnflyasiya artıb

Cari ilin may ayında avrozona­da illik inflyasiya 8,1 faiz təşkil edib. Bunu Avropa Statistika İnstitutu (“Avrostat”) açıq­layıb. Bildirilir ki, bu, 1997-ci ildən aylıq statistikala­rın dərc edildiyi vaxtdan qeydə alınan ən yüksək göstəricidir. İnflyasiyaya səbəb kimi Ukrayna münaqişəsi fonunda ərzaq və enerji­nin qiymətlərinin bahalaşması göstərilir.

Məlumatı “Euronews”yayıb.

İtaliya

Etna vulkanı yenidən oyanıb

Avropanın ən böyük fəaliyyətdə olan vulkanı Etna yenidən oyanıb. Bildirilir ki, İtaliya­nın Siciliya ada­sındakı vulkanda lava axınları müşahidə edilib, bölgədə çox saylı vulkanik zəlzələ qeydə alınıb. Vulkanın ətəyindəki yaşayış məntəqələrini kül və toz dumanı ilə örtülüb.

Xəbəri BBC verib.

Fransa

Zidan PSJ-ni çalışdıra bilər

Parisin PSJ klubunun prezidenti Nasir Əl Xələfi yaxın günlərdə Zinəddin Zidanla görüşəcək. Bunu şəxsi “Twitter” hesabında jurnalist Adrien Qrenye yayıb. Mənbə Xələfinin Zidanı baş məşqçi postuna gətirməyi və ona illik 25 milyon avro məvacib ödəməyi qarşısına məqsəd qoyduğunu hədəfləyib. Xəbərə görə, klub başqanı Zidanı razı sala biləcəyi halda, Pa­ris təmsilçisinin indiki baş məşqçisi Maurisio Poçettino təzminat qarşılığında istefaya göndəriləcək.

Məlumatı “Figaro” yayıb.

Hazırladı: Elçin ABBASOV, “Xalq qəzeti”

XARİCİ XƏBƏRLƏR bölməsi