Brüssel razılaşması regionun təhlükəsizliyinə önəmli töhfə verəcək

SİYASƏT
26 May
08:37

Milli Məclisin deputatı, Müdafiə, təhlükəsizlik və korrupsiya ilə mübarizə komitəsinin üzvü Arzu Nağıyev bugünlərdə Belçi­kanın paytaxtı Brüsseldə Azərbaycan Prezidenti, Avropa İttifaqı Şurasının Prezidenti və Ermənistanın baş naziri arasında keçirilən növbəti görüş, onun müsbət nəticələri barədə mediaya açıqlama­sında bildirib:

– Üçtərəfli Brüssel görüşündə Zəngəzur dəhlizinin açılması, o cümlədən həm dəmir yolu, həm də avtomobil yolunun çəkilməsi məsələləri ilə bağlı razılığın əldə olunması Azərbaycanın işğal olunmuş torpaqla­rının azad edilməsinin Cənubi Qaf­qazda yaratdığı reallıqların beynəlxalq diplomatiya müstəvisində də təsdiqini tapması kimi dəyərləndirilməlidir. Sərhədlərin delimitasiyası ilə əlaqədar razılığın əldə olunması sülh prosesində gedişatın müsbətə doğru irəliləməsi haqqında ümidli fikirlər formalaşdırdı.

Bu önəmli görüşdən bir gün sonra Azərbaycan Prezidenti İlham Əliyevin “Azərbaycan Respublikası ilə Ermənistan Respublikası arasında dövlət sərhədinin delimitasiyası üzrə Dövlət Komissiyasının yaradılması haqqında” sərəncam imzalaması və eyni vaxtda, Ermənistan baş naziri Nikol Paşinyan da delimitasiya ko­missiyasının yaradılması haqqında tapşırıq verməsi bundan əvvəl aparıl­mış danışıqların əməli məcraya daxil olmasının göstəricisidir. Delimitasiya komissiyalarının, nəhayət, fəaliyyətə başlaması, Brüssel görüşündən sonra həm Azərbaycan, həm də Ermənistan tərəfindən komissiyanın yaradılması iki ölkə arasında sülh razılaşmalarının əldə edilməsi yönündə daha bir müsbət addımdır.

Azərbaycan tərəfdən komissiya­nın rəhbəri Baş nazirin müavini Şahin Mustafayevdir. O, həm də kommunika­siyaların açılması, dəhlizlərin yaradıl­ması üzrə komissiyanın rəhbəridir. Güc strukturlarının, birbaşa bu proseslərlə bağlı qurumların, işğaldan azad edilmiş ərazilərin icra hakimiyyəti başçılarının da komissiyaya daxil edilməsi onun fəaliyyətinin mükəmməl qurulmasına xidmət edir. Ermənistanla həmsərhəd rayonların icra başçılarının delimitasiya komissiyasında təmsil edilməsi göstərir ki, sərhəddə keçid məntəqələrinin yaradılmasında onların iştirakı zəruridir. Ermənistan tərəfinin yaratdığı komis­siyanın tərkibinə isə onların kadastr xidməti, xüsusi xidmət orqanları, Müdafiə Nazirliyi və digər qurumlar təmsil olunur.

Deputat Arzu Nağıyev sonda deyib: “Əsas məsələ odur ki, prosesə start verilib. Azərbaycanın sülh danı­şıqlarında təklif etdiyi 5 maddədən biri artıq həyata keçirilir. Bundan sonra sülh müqaviləsinin hazırlanması gündəmə gəlir. Ona görə də düşünürəm ki, Brüs­sel görüşündə əldə edilən razılaşmalar Azərbaycan tərəfinin növbəti diplomatik uğurudur. Bu, həm də növbəti mühüm işlərin başlanğıcıdır, digər detalların müzakirə çevrəsinə gətirilməsini aktu­allaşdırır.

Hazırladı: T.AYDINOĞLU,

“Xalq qəzeti”

SİYASƏT bölməsi