Qarabağ incilərini əks etdirən sərgi

Ukraynada T. Şevçenko adına Milli Muzeydə Azərbaycan Rəssamlar İttifaqının üzvü, xalçaçı-rəssam Eldar Hacıyevin əl işlərindən ibarət sərgi təşkil olunub.

Azərbaycanın Ukrayna­dakı səfirliyinin təşkilatçılığı ilə baş tutan sərginin açılı­şında səfirliyin əməkdaşları, hökumət rəsmiləri, müxtəlif ölkələrin Kiyevdəki diplomatik korpuslarının və ictimaiyyətin nümayəndələri, diaspor fəalları iştirak ediblər.

Xalça və rəsm işlərindən ibarət olan sərgidə əsas mövzu Azərbaycan mədəniyyət nümunələri və Qarabağ irsidir. Xüsusilə Qarabağ atları sərginin əsas komponentlərindədir.

Açılışda iştirak edən Ukrayna Mədəniyyət nazi­rinin 1-ci müavini Rostis­lav Karandeyev nümayiş olunan əsərlərdə milli komponentlərin aydın ifadə olunduğunu söyləyərək deyib ki, bu, ölkəsinin ictimaiyyəti üçün maraqlı sərgilərdəndir.

T. Şevçenko adına Milli Muzeyin baş direktoru Dmitri Stus Bakıda Xalça Muzeyinə ziyarətini xatırlayaraq təəssüratını bölüşüb: "Hesab edirəm ki, xalçaçılıq qiymətli ənənədir. Azərbaycanın uğur­ları, qələbələri bizim üçün vacibdir. Uğur qazanmaq asan iş deyil, o cümlədən incəsənət sahəsində. Əvvəlcə həmin sahənin sirlərinə bələd olmaq lazım­dır".

Rəssam Eldar Hacıyev bildirib ki, burada rəsm və xalçalarla birgə, ümumilikdə, 25 iş nümayiş olunur: "Bu sərgi Azərbaycanın Ukrana­dakı səfirliyinin, xüsusilə səfir Elmira Axundovanın xüsusi dəstəyi ilə baş tutdu. Bunun bizim üçün xüsusi önəmi var. Sərgi yanvarın sonunadək davam edəcək".

M.MÜKƏRRƏMOĞLU,

“Xalq qəzeti”