Azərbaycanda ipoteka kreditlərinin həcmi 2 milyard manatı keçib

Azərbaycan Respublikası İpoteka və Kredit Zəmanət Fondundan verilən məlumata görə, Fondun vəsaiti hesabına verilən ipoteka kreditlərinin həcmi cari ilin yanvar ayının 13-də 2 milyard manatı keçib. Məlumatda bildirilir ki, 2006-cı ildən fəaliyyətə başlayan ipoteka kreditləşməsi mexanizmi çərçivəsində bugünədək 37 minə yaxın ailə mənzil təminatının yaxşılaşdırılmasına nail olub.

Hazırda dövlətin əsas sosial prioritetlərindən biri olan mənzil təminatı mexanizmlərinin təkmilləşdirilməsi və əhali üçün əlçatanlığının artırılması fondun qarşı­sına qoyduğu əsas məqsədlərdəndir. İpoteka kreditləşməsi sisteminin fəaliyyət göstərdiyi son 15 il ərzində davamlı dövlət dəstəyi sayəsində mənzil şəraitinin yaxşılaşdırılması­na ehtiyacı olan əhali qrupları üçün effektiv və səmərəli maliyyələşmə mexanizmi formalaş­dırılıb.

İpoteka kreditləri üzrə əlverişli faiz dərəcələrinin qorunub saxlanılması, dövlət qarşısında xüsusi xidmətləri olan şəxslər üçün güzəştli ipoteka proqramlarının tətbiqi bu mexanizmin sosial dövlət proqramı olaraq kifayət qədər uğur qazanmasına səbəb olmuşdur. Güzəştli ipoteka kreditlərinin maliyyələşdirilməsi üçün davamlı olaraq dövlət büdcəsindən vəsaitlərin ayrılması təmin edilib. İpoteka kreditlərindən fayda­lananların 70 faizə yaxını gənclər və gənc ailələrdir.

İpoteka kreditləşməsi mexanizmində ən yaxşı beynəlxalq təcrübəyə uyğun olaraq yeniliklərin tətbiqi, eləcə də kredit şərtlərinin ölkə üzrə maliyyə-iqtisadi konyunktura və mövcud reallıqlar nəzərə alınmaqla əhalinin tələblərinə uyğunlaşdırılması istiqamətində tədbirlərin görülməsi bu gün də davam etdi­rilir. Əhaliyə xidmət səviyyəsinin artırılması, şəffaflığın təmin edilməsi məqsədilə 2015-ci ildən etibarən vətəndaşların müraciətlərinin qəbulundan ipoteka kreditləri üzrə ödənişlərin qəbulunadək proseslərin tam avtomatlaşdırıl­ması həyata keçirilib.

Fond 2022-ci ildə də əhalinin mənzil təminatı sahəsində öz fəaliyyətini davam etdirəcək.

“Xalq qəzeti”