Köhnə versiya

Ən son xəbərlər

Son buraxılış
Arxiv

Kolumbiya 2050-ci il üçün iqlim strategiyasını açıqlayıb

 

 

Kolumbiya Prezidenti İvan Duke Markes və ölkənin ətraf mühit və davamlı inkişaf naziri Karlos Eduardo Korrea Şotlandiyanın Qlazqo şəhərində keçirilən İqlim konfransında Kolumbiyanın “E2050” Uzunmüddətli İqlim Strategiyasını təqdim ediblər. Bu siyasətin əsas məqsədi Paris Sazişinin müddəalarına əməl etmək, ölkənin flora və faunasının biomüxtəlifliyini qorumaq və iqlim dəyişikliyinin planetə təsirlərinin yumşaldılmasına töhfə verməkdir.

Bildirilir ki, təqdimat mərasimində çıxış edən Pre­zident Duke deyib: “E2050”- nin tərtibi aşağı istixana qazı emissiyaları ilə inkişaf üçün uzunmüddətli yol xəritəsinin yaradılması ilə bağlı Pa­ris Sazişinin dördüncü maddəsinə və 19-cu bəndinə uyğundur. Bu strategiya daha təmiz və daha davamlı iqtisadi və sosial inkişaf üçün bir fürsətdir”.

“E2050” biomüxtəlifliyin kompleks şəkildə idarə edilməsi, davamlı şəkildə istehsal və istehlak, kənd, dəniz və sahil inkişafı, davamlı hərəkətlilik və infrastruktur, o cümlədən birlikdə tətbiq olunan pla­netin qayğısına əhəmiyyətli dərəcədə töhfə verəcək digər amillərlə bağlı öhdəlik götürür.

Karlos Eduardo Korrea məsələni şərh edərək deyib: “Bu mühüm iqlim strategiyası Kolumbiyanın iqlim dəyişikliyi ilə bağlı yaranan risklərin azaldılmasına töhfə vermək üçün ətraf mühitə dair öhdəliklərinə təkan verir. Milli hökumətin qarşıya qoyduğu məqsədləri arasında bunlar öz əksini tapır: 2050-ci ilə qədər karbon-neytral ölkə olmaq, istixana qazı emissi­yalarını 51 faiz azaltmaq və 2030-cu ilə qədər meşələrin qırılmasını sıfıra endirmək. Bu, o deməkdir ki, Kolumbiya istehsal və istehlak tərzini dəyişdirmək üçün lazımi ad­dımlar atır, həmçinin iqtisadi sektoru və ərazilərinin riskləri idarə etmək qabiliyyətini artırması üçün çalışır”.

“E2050”-nin formalaşdırıl­ması prosesi Ətraf Mühit və Davamlı İnkişaf Nazirliyinin, Milli Planlaşdırma Departa­mentinin və Kolumbiyanın Xa­rici İşlər Nazirliyinin rəhbərliyi altında, Fransa Hökumətinin maliyyə və texniki dəstəyi, eləcə də, Amerikalararası İn­kişaf Bankı, Birləşmiş Millətlər Təşkilatının İnkişaf Proqramı və Dünya Resursları İnstitutu­nun da texniki dəstəyi ilə 22 ay ərzində həyata keçirilib.

Rövşən TOĞRUL, “Xalq qəzeti”

11 Noyabr 2021 00:28 - XARİCİ XƏBƏRLƏR
XARİCİ XƏBƏRLƏR
26 May 2022 | 08:00
Xarici xəbərlər

Köhnə versiyamızdan xəbərləri izlə