Köhnə versiya

Ən son xəbərlər

Son buraxılış
Arxiv

Azərbaycan həqiqətlərinin dünyaya çatdırıldığı mötəbər beynəlxalq tribuna

 

“Azərbaycan beynəlxalq siyasi arenada xarici siyasətini də uğur­la davam etdirir. Qoşulmama Hərəkatındakı fəaliyyəti, eyni zamanda, beynəlxalq aləmin bu ikinci böyük qurumuna sədrliyi çərçivəsində gördüyü işlər ölkəmizin dünya miqyasında nüfuzunu daha da artırıb”. Azərbaycan Həmkarlar İttifaqları Konfederasiyasının sədri, Milli Məclisin deputatı Səttar Möhbalıyev müstəqil dövlətimizin xarici siyasətinin bu ciddi uğuru barədə mediaya açıqlamasının davamında bildirib:

– Qurumun XVIII Zirvə görüşünün Bakıda uğurla təşkil olunması, üzv ölkələrinin qanuni mənafelərinin layiqincə müdafiəsi, pandemiyaya qarşı birgə mübarizə üçün bir sıra beynəlxalq təşəbbüslərlə çıxış etməsi Azərbaycanın sədr kimi öz üzərinə düşən işləri layiqincə yerinə yetirdiyini göstərir. Bu uğurların təməlində cənab Prezident İlham Əliyevin diplomatik məharəti, lider təşəbbüskarlığı, məqsədyönlü xarici siyasəti və şəxsi nüfuzu dayanır. Dövlət başçımızın dediyi kimi, Qoşulmama Hərəkatında təmsil olunmaq ölkəmizin mənafeyinə tam uyğundur.

Əsasən, bu təşkilatın əsas prinsipləri sayılan “Bandunq prinsipləri” Azərbaycanın xarici siyasətində prioritet təşkil edir. Azərbaycan rəhbəri İlham Əliyev həmişə beynəlxalq tribunalardan ölkələrin suverenliyinə və ərazi bütövlüyünə hörmət olunmasının vacibliyini bəyan edib. Azərbaycan sədr kimi də bu prinsipləri əsas hesab edərək beynəlxalq miqyasda öz mövqeyini ortaya qoyur.

Prezident İlham Əliyevin iyulun 13-də Qoşulmama Hərəkatının Xarici işlər nazirlərinin aralıq konfransında çıxışını iştirakçı dövlətlərin xalqları və rəhbərləri böyük maraqla qarşıladılar. Dövlətimizin başçısı Azərbaycanın quruma sədrlik etdiyi ötən dövr ərzində görülən işlər barədə ətraflı məlumat verdi. Azərbaycanın pandemiya ilə mübarizədə 30-dan çox ölkəyə humanitar və maliyyə yardımı etməsi, Ümumdünya Səhiyyə Təşkilatına 10 milyon ABŞ dolları həcmində könüllü olaraq maliyyə vəsaiti verməsi ölkəmizin humanist xarakterindən xəbər verir. Cənab İlham Əliyev dəfələrlə koronavirusa qarşı peyvəndin ədalətli bölüşdürülməsi məsələsini qaldırıb və bütün platformalarda, həmçinin Qoşulmama Hərəkatı çərçivəsində bunu bəyan edib.

Qurumun sonuncu iclasında da cənab İlham Əliyev bu məsələyə toxundu və bildirdi ki, Azərbaycan ehtiyaclarından qat-qat artıq peyvənd tədarük edən bəzi ölkələrin davranışını ictimai şəkildə qınayır. Qeyd edim ki, Azərbaycan peyvəndi alıb öz ölkəsində tətbiq edən ilk ölkələrdən biri oldu. Ən vacib məqam isə ölkəmizdə vaksinasiya prosesinin ödənişsiz həyata keçirilməsidir. Bu, dövlətmizin vətəndaşlarına olan diqqət və qayğısının əlamətdir.

Azərbaycan rəhbərinin həmin çıxışında artıq tarixə qovuşmuş Dağlıq Qarabağ münaqişəsindən bəhs etməsinin, regionda yaranmış gerçəklikləri iştirakçıların diqqətinə çatdırmasının Azərbaycanın haqq işinin mötəbər beynəlxalq tribunadan dünyaya qətiyyətlə təqdim edilməsi olduğunu vurğulayan AHİK sədri daha sonra deyib:

– Dövlət başçımız bəyan etdi ki, 44 günlük müharibə nəticəsində Azərbaycan ərazi bütövlüyünü və tarixi ədaləti bərpa edib, BMT Təhlükəsizlik Şurasının münaqişə ilə bağlı qəbul etdiyi qətnamələrin icrasını həyata keçirib. Biz müharibə vaxtı və ondan sonrakı dövrdə Qoşulmama Hərəkatı ölkələrinin Azərbaycanın ərazi bütövlüyünə və suverenliyinə dəstəyinin dəfələrlə şahidi olmuşuq. Prezident İlham Əliyev də bu münasibəti həmişə yüksək qiymətləndirib.

Qoşulmama Hərəkatı tərəfindən Bakı Zirvə görüşünün Yekun Sənədində Azərbaycanın ərazi bütövlüyünün bir daha təsdiqlənməsi, Tovuz döyüşləri zamanı qəbul edilmiş kommunike, Vətən müharibəsi zamanı xüsusi bəyanatın qəbul olunması və ərazi bütövlüyünün bərpasına yönəlmiş səylərinə dair Azərbaycanla həmrəyliyin ifadə edilməsi, həmçinin BMT Təhlükəsizlik Şurasının bəzi üzvlərinin Azərbaycan əleyhinə qərəzli bəyanat qəbul etdirmək cəhdlərinin qarşısının alınması Qoşulmama Hərəkatı çərçivəsində ölkəmizin uğurlu diplomatik fəaliyyətinin və Azərbaycanın ədalətli mövqeyinin nəticəsidir.

Hazırladı: T.AYDINOĞLU, “Xalq qəzeti”

5 Avqust 2021 00:34 - SİYASƏT
SİYASƏT

Köhnə versiyamızdan xəbərləri izlə