Köhnə versiya

Ən son xəbərlər

Son buraxılış
Arxiv

Dahi mütəfəkkir Nizami Gəncəvinin elmi dünyagörüşü haqqında kitabın təqdimatı keçirilib

“Art Council Azerbaijan”ın təşkilatçılığı ilə “Art Tower Terrace”da AMEA prezidenti katibliyinin rəisi, siyasi elmlər üzrə fəlsəfə doktoru, dosent Eldar Əmirovun rus dilində çapdan çıxmış “Şairlik şöhrətinin kölgəsində qalmış mütəfəkkir: Nizami Gəncəvinin elmi dünyagörüşü haqqında” kitabının təqdimatı keçirilib.

Təqdimat mərasimində çıxış edən kitabın müəllifi E.Əmirov qeyd edib ki, N.Gəncəvi fars dilində yazmasına baxmayaraq, ürəyi hər zaman Azərbaycanla döyünüb. O, şairin əsərlərində Azərbaycan xalqı ilə yanaşı, Qafqaz Albaniyasında yaşamış amazon qəbilələri, qədim Bərdə şəhərinin təsviri, xalqımızın qəhrəman igidləri və s. ilə bağlı nadir faktlara da yer ayrıldığına diqqət çəkib.

Kitabın müəllifi “Nizami Gəncəvi İli”nin Azərbaycanın möhtəşəm Qələbəsi, qədim Azərbaycan torpaqları olan Qarabağın geri qaytarılması sevinci ilə müşayiət olunduğunu qeyd edərək bunun xalqımız tarixində olduqca əlamətdar hadisələrdən olduğunu bildirib.

O, kitabda şairlik şöhrətinin kölgəsində qalmış mütəfəkkir Nizaminin elmi dünyagörüşü, dahi şəxsiyyətin məhrumiyyətlərlə, itkilərlə, əzmkar mübarizə və kamillik nümunələri ilə dolu həyat yolu, həmçinin yaşadığı, yazıb-yaratdığı mühitin ictimai-siyasi, ədəbi-mədəni xüsusiyyətlərindən bəhs olunduğunu bildirib. E.Əmirovun sözlərinə görə, kitabda Nizaminin biliyə və alimin cəmiyyətdəki yüksək məqamına verdiyi dəyərə, eləcə də onun elmin əməli əhəmiyyəti haqqındakı fikirlərinə toxunulur. Şairin ictimai-siyasi məsələlərə, təbiət elmlərinə, tibb və psixologiyaya dair baxışlarının təhlili aparılır, o cümlədən “Xəmsə”nin tarixi məxəz olaraq əhəmiyyəti məsələsi konkret hadisələrin və şəxslərin nümunəsində nəzərdən keçirilir.

E.Əmirov vurğulayıb ki, ərəb, fars, türk və digər ölkələrin orta əsr Şərq ədəbiyyatına nəzər saldıqda, yaradıcılığında elmi fikirlərə Nizami qədər yer ayıran ikinci bir sənətkara rast gəlmək mümkün deyil. Dahi mütəfəkkirin “Xəmsə”sini dövrünün ensiklopediyası adlandıran E. Əmirov  Yer kürəsindən kənarda aləmlərin mövcudluğuna dair fikirlərin  N.Gəncəvinin də əsərlərində mövcud qeyd edib. Əlavə edib ki, “Xosrov və Şirin” poemasında ulduzların hər birində yaşayışın olduğu göstərilir. Lakin Nizami C.Bruno kimi bu fikirləri vahid konsepsiya şəklində deyil, ehtimallara əsaslanaraq təqdim edib. Onun sözlərinə görə, bu faktlar Nizaminin kainatın quruluşu ilə dərindən maraqlandığını və biliklərə sahib olduğunu göstərir.

“Ümid edirəm ki, yaxın zamanda tərcüməçilərimiz Nizaminin əsərlərinin elmi tərcüməsinin həyata keçirilməsi məsələsinə diqqət yetirəcəklər”, – deyən E.Əmirov kitabın rus dilində yazılmasının səbəbinin də məhz bu amillərlə bağlı olduğunu, Nizaminin elmi və bədii kanonlara uyğun tərcüməyə layiq əsərlər yaratdığını diqqətə çatdırıb.

Tədbirdə iştirak edənlərə kitabın nüsxəsi təqdim olunub.

Təqdimat mərasimindən sonra tədbir bədii hissə ilə davam edib, tanınmış opera ifaçıları və musiqiçiləri tərəfindən “Carmen”, “Tosca”, “Faust” və s. opera və baletlərdən parçalar səsləndirilib.

Tədbirdə AMEA nümayəndələri, Azərbaycanın tanınmış simaları, görkəmli mədəniyyət və incəsənət xadimləri, eləcə də Fransa, İndoneziya, İtaliya, Yunanıstan, Hindistan və Qırğızıstanın ölkəmizdəki səfirləri iştirak ediblər.

 

Qabil YUSİFOĞLU, “Xalq qəzeti”

 

14 İyul 2021 15:46 - ELM
ELM

Köhnə versiyamızdan xəbərləri izlə