Köhnə versiya

Ən son xəbərlər

Son buraxılış
Arxiv

“Vətənpərvərlik mövzusunda ədəbiyyat müsabiqəsi”nin qaliblərinə mükafatlar təqdim edildi

Bu gün Beynəlxalq Muğam Mərkəzində Mədəniyyət Nazirliyin 2020-ci il oktyabrın 21-də elan etdiyi “Vətənpərvərlik mövzusunda ədəbiyyat müsabiqəsi”nin qaliblərinin təltifetmə mərasimi keçirildi. Əvvəlcə tədbir iştirakçıları 44 günlük Vətən müharibəsində şəhid olan qəhrəman oğullarımızın xatirəsini bir dəqiqəlik sükutla yad etdilər.

 

Mərasimdə çıxış edən mədəniyyət naziri Anar Kərimov dedi ki, hamımız Azərbaycanın dövlətçilik tarixinin ən qürurverici hadisələrindən olan 44 günlük Vətən müharibəsinin şahidləriyik: “Vətən müharibəsi Azərbaycan dövlətinin güclü siyasi iradəsini, Azərbaycan xalqının xarakterini, milli maraqlarımız naminə dünya azərbaycanlılarının həmrəyliyini, Ordumuzun döyüş rəşadətini, canından əziz tutduğu Vətən sevgisini və Ali Baş Komandanın bu proseslərdə peşəkar liderliyini dünyaya nümayiş etdirdi”.

Nazir ölkə başçısı tərəfindən Şuşa şəhərinin Azərbaycanın mədəniyyət paytaxtı elan edilməsinin əhəmiyyətini vurğuladı: “Bir çox dövlətlərin siyasi, iqtisadi paytaxtları var, amma rəsmi formada mədəniyyət paytaxtı olan ölkələrin sayı azdır. Bu, Azərbaycan Respublikası Prezidentinin mədəniyyətimizə göstərdiyi xüsusi diqqətin ən bariz nümunəsidir. Bu gün işğaldan azad olunmuş torpaqlarda intensiv formada aparılan bərpa-quruculuq işləri ilə yanaşı, mədəniyyətimizin, xalqımızın milli ruhunun həmin ərazilərə qaytarılması prosesi də həyata keçirilir. Mədəniyyət Nazirliyi tərəfindən bu istiqamətdə sistemli tədbirlər görülür. Ölkə başçısının təşəbbüsü və Heydər Əliyev Fondunun dəstəyi ilə Şuşa şəhərində may ayında “Xarıbülbül” musiqi festivalı keçirildi. Bu festival Azərbaycanın nə qədər multikultural və tolerant ölkə olduğunu bir daha nümayiş etdirdi”. 

15 İyun – Milli Qurtuluş Günündə ölkəmizin mədəniyyət paytaxtında Azərbaycan və Türkiyə dövlət başçılarının imzaladığı iki qardaş ölkənin müttəfiqliyi haqqında Şuşa Bəyannaməsini yüksək qiymətləndirən Anar Kərimov qeyd etdi ki, bu tarixi sənəd mühüm strateji mahiyyəti ilə yanaşı, işğaldan azad olunmuş ərazilərdə, ümumilikdə regionda mədəni əlaqələrin inkişafına, sabitliyin bərqərar olmasına öz töhfəsini verəcək.

“Vətənpərvərlik mövzusunda ədəbiyyat müsabiqəsi” nə toxunan nazir qeyd etdi ki, müsabiqə xalqımızda hərbi-vətənpərvərlik ruhunun yüksəldilməsi, Vətənimizin suverenliyi uğrunda Azərbaycan əsgərinin döyüş rəşadətinin və şəhidlərimizin xatirəsinin əbədiləşdirilməsi, gələcək nəsillər üçün II Qarabağ müharibəsi mövzusunda yeni bədii əsərlərin yaradılması məqsədilə təşkil olunmuşdu. Müsabiqəyə ölkəmizlə yanaşı, Türkiyədən 2, Rusiyadan 2, İrandan 1 nəfər əsər təqdim edib: “Mən qalib olan əsərlərlə tanış oldum və diqqətimi xüsusi bir məqam çəkdi. İndiyə qədər bu mövzuda yazılan ədəbi əsərlərdə Vətən həsrəti, nisgil, kədər tərənnüm olunurdusa, bu əsərlərdə şücaət, məğrurluq, qürur və Zəfər hissi vəsf olunub. Əlbəttə ki, bu amil Vətən müharibəsində qazanılan şanlı Qələbənin yazarlarımızda yaratdığı qalib ruhla bağlıdır. İnanıram ki, gələcəkdə bu qalib əsərlər əsasında serial və filmlər ərsəyə gələcək”.

Anar Kərimov nazirliyin ənənəvi “Qızıl kəlmə” ədəbi mükafatının beynəlxalq təcrübəyə uyğun, mütərəqqi və sistemli proqrama əsaslanan yeni bir ədəbi mükafatla əvəzlənməsi üçün layihələndirmə prosesi aparıldığını diqqətə çatdırdı. Dedi ki, bu işə yazarlardan gələn çoxsaylı müraciətlər nəzərə alınmaqla start verilib: Mədəniyyət Nazirliyinin “Azərbaycan kitabının dünyada tanıdılması” layihəsi də daha ciddi tərcümə proqramı ilə əvəz olunacaq. Bu proqram yazarlarımızın xarici dilli müsabiqələrə, geniş oxucu kontingenti olan coğrafiyalara çıxışını təmin edəcək. Bir daha müsabiqədə qalib gəlmiş hər bir şəxsi təbrik edir və fəaliyyətlərində uğurlar arzulayıram”.

Azərbaycan Yazıçılar Birliyinin katibi, müsabiqə komissiyasının üzvü Rəşad Məcid layihənin əhəmiyyətini, münsiflər heyətinin əməyini yüksək qiymətləndirdi. O,  gənclər arasında vətənpərvərlik hisslərinin artırılmasında müsabiqənin rolunu xüsusi qeyd etdi. Axırda R.Məcid Şuşada olduğu günlərdə qələmə aldığı şeirini səsləndirdi. Komissiyanın üzvü, Nizami adına Ədəbiyyat İnstitutu Uşaq ədəbiyyatı şöbəsinin müdiri Elnarə Akimova Mədəniyyət Nazirliyinə ədəbiyyata və sözə verdiyi dəyərə görə təşəkkür etdi.

Çıxışlardan sonra bədii qiraət ustaları Xəzər Süleyman və Sabirə Abdullayeva qalib əsərlərdən parçalar səsləndirdilər.

Daha sonra qaliblərə mükafatlar təqdim edildi. Mədəniyyət nazirinin müvafiq əmrinə əsasən, müsabiqənin “Peşəkar yaradıcı şəxslər” kateqoriyasında hər bir janr üzrə qaliblərə 1500 manat, “Həvəskar yaradıcı şəxslər” kateqoriyasında hər bir janr üzrə qaliblərə 800 manat məbləğində pul mükafatı və nazirliyin xüsusi diplomu təqdim olundu. “10-15 yaş arası uşaqlar” kateqoriyasında isə hər bir janr üzrə qaliblərə fəxri fərman və nazirliyin tabeliyində olan muzeylərə birillik ödənişsiz ziyarət kartı hədiyyə edildi.

 

Qabil YUSİFOĞLU

“Xalq qəzeti”

17 İyun 2021 22:47 - MƏDƏNİYYƏT
MƏDƏNİYYƏT

Köhnə versiyamızdan xəbərləri izlə