Köhnə versiya

Ən son xəbərlər

Son buraxılış
Arxiv

Kolumbiya mətbuatında Xocalı soyqırımı haqqında məqalə işıq üzü görüb

Kolumbiya və Latın Amerikasının ən nüfuzlu rəqəmsal siyasi xəbər agentliklərindən olan “El Expediente” portalında tanınmış jurnalist Roberto Trobaxonun müəllifi olduğu “Azərbaycan möcüzəsi” adlı yazı dərc olunub.

"Xalq qəzeti" AZƏRTAC-a istinadən xəbər verir ki, yazıda Azərbaycanın illər boyu təcavüzə məruz qaldığı, Dağlıq Qarabağ və 7 ətraf rayon olmaqla ərazisinin 20 faizinin Ermənistan tərəfindən işğal edildiyi, 1 milyona yaxın azərbaycanlının öz yurdlarından qovularaq məcburi köçkünə çevrildiyi, bu təcavüz ərzində erməni silahlı qüvvələri tərəfindən 1992-ci ilin 26 fevral tarixində Xocalı şəhərində soyqırımı törədildiyi, bu zaman 63-ü uşaq və 106-ı qadın olmaqla 613 nəfər mülki azərbaycanlının amansızcasına qətlə yetirildiyi bildirilir.

Qeyd olunur ki, bütün bunlara baxmayaraq, Azərbaycan son 30 il ərzində yüksək siyasi, iqtisadi və mədəni-humanitar inkişaf yolu keçmiş, bütün dünya üçün çoxmədəniyyətlilik modelinə çevrilmişdir.

Son müharibə zamanı Azərbaycanın nəhayət erməni təcavüzünə son qoymağa və öz tarixi ərazilərini azad etməyə nail olduğu, ancaq bu müharibə zamanı da Ermənistanın mülki insanları hədəf aldığı, Gəncə, Bərdə və münaqişə bölgəsindən kənarda yerləşən digər Azərbaycan şəhərlərinə qadağan olunmuş döyüş başlıqlarından istifadə etməklə ballistik raket zərbələri endirdiyi və bu hücumların “Human Rights Watch”, “Amnesty İnternational” kimi beynəlxalq təşkilatlar tərəfindən pisləndiyi söylənir.

Münaqişə ilə bağlı BMT TŞ qətnamələrinə 30 ildir əməl etməyən Ermənistanın işğal etdiyi ərazilərdə Azərbaycanın tarixi-mədəni irsini məqsədli şəkildə tamamilə məhv etdiyi, eləcə də ətraf mühitə xeyli ziyan vurduğu, azad edilmiş şəhərlərin Hiroşima ilə müqayisə edildiyi və 30 il ayrılıqdan sonra azərbaycanlı məcburi köçkünlərin öz evlərinə qayıda bilməsi üçün Azərbaycanın hazırda bu ərazilərdə yenidənqurma işləri apardığı qeyd olunur.

Müəllif Ermənistanda bəzi qisasçı qüvvələrin mövcudluğu səbəbindən regionda sülhün hələ də dayanıqsız olduğunu, bu qüvvələrin Azərbaycanı təxribata çəkməyə çalışdığını, virtual platformalarda da Azərbaycan haqda böhtanlar və saxta məlumatlar yaydığı və Ermənistan tərəfinin hələ də bölgədə minalanmış ərazilərin xəritəsini belə təqdim etməkdən imtina etdiyini bildirir.

Bütün bunlara rəğmən, Azərbaycanın qlobal və regional inteqrasiya proseslərində fəallığını durmadan artırdığı, BTC, TAP, TANAP, BTQ kimi irimiqyaslı layihələrlə regionun inkişafına böyük töhfə verdiyi, Azərbaycan Xalq Cümhuriyyətindən miras qalmış dəyərlərə sadiq qalaraq dini və etnik mənsubiyyətindən asılı olmadan bütün ölkə vətəndaşlarına bərabər tərəqqi imkanları yaratdığı qeyd olunur, münaqişə və təcavüz mühitində inkişaf etməyə çalışan ölkələrin “Azərbaycan möcüzəsi”nə nəzər salmalı olduqları vurğulanır.

25 Fevral 2021 09:05 - XOCALI
XOCALI

Köhnə versiyamızdan xəbərləri izlə