Köhnə versiya

Ən son xəbərlər

Son buraxılış
Arxiv

Xəzərdə dalğanın hündürlüyü 7,5 metrə çatacaq

Dövlət Dəniz Agentliyi Xəzər dənizinin Azərbaycan Respublikasına mənsub olan sektorunun hidrometeoroloji rejimini və iqlim xüsusiyyətlərini mütəmadi olaraq nəzarətdə saxlayır. Bununla əlaqədar olaraq Agentlik bildirib ki, Gəmilərin Uzaq Məsafədən Tanınma və İzləmə Milli Mərkəzinə təhlükəli hidrometeoroloji hadisə haqqında xəbərdarlıqla bağlı məlumat daxil olmuşdur.

 Dövlət Dəniz Agentliyi qeyd olunan hava şəraitinin kəskinliyini və bununla bağlı zəruri addımların atılmasını nəzərə alaraq, ictimaiyyət və şəxsi heyət üçün bir sıra məlumatların açıqlanmasını zəruri hesab edir.

Agentliyin mətbuat xidmətindən verilən məlumatda bildirilir ki, fevralın 23-ü axşamdan Xəzər dəniz akvatoriyasında – Bakıda və Abşeron yarımadasında Şimal-Qərb, Şimal küləyinin sürəti saniyədə 18-23 metrə, arabir 25-30, fevralın 24-də isə yarımadanın bəzi yerlərində arabir 32-35 metrədək güclənəcəyi, çovğun olacağı, havanın temperaturunun ötən günlərlə müqayisədə tədricən 5-10 dərəcə aşağı enəcəyi ehtimal edilir. Dənizdə dalğanın hündürlüyünün 2.0-4.0 m, sonrakı inkişafda 5.5-7.5 metrə çatacağı gözlənilir.

Hava proqnozu Dövlət Dəniz Agentliyinin Milli Mərkəzinə daxil olan andan etibarən gəmi sahibləri, liman kapitanları, liman nəzarət müfəttişləri müvafiq tədbirlərin həyata keçirilməsi və xidmətin gücləndirilməsi ilə bağlı rəhbər heyət tərəfindən təlimatlandırılmışdır. Gəmilərin Hərəkətinin İdarəetmə Xidmətinin ərazisində lövbərdə duran, hərəkətdə olan gəmilərə hava şəraitinin kəskinləşməsi ilə əlaqədar zəruri məlumatlar ötürülmüş və müvafiq təlimatlar verilmişdir. Hava şəraitinə uyğun olaraq gəmilərin təhlükəsiz şəkildə lövbər sığınacaqlarında dayanması təmin edilib.

Gəmilər müvafiq lövbər sığınacaqlarına yerləşdirildikdən sonra onların təhlükəsiz şəkildə lövbərdə dayanması prosesi radarlar vasitəsilə fasiləsiz müşahidə edilir. Dövlət Dəniz Agentliyinin Gəmilərin Uzaq Məsafədən Tanınma və İzləmə Milli Mərkəzi tərəfindən gəmilərin hərəkətinə və limanlara hava şəraitinə uyğun olaraq giriş-çıxışa icazə verilməsi, hərəkətin məhdudlaşdırılması və limanların bağlanması ilə bağlı müvafiq tədbirlər görülmüşdür.

                                                                                        “Xalq qəzeti”

 

23 Fevral 2021 13:38 -

Köhnə versiyamızdan xəbərləri izlə