Nümayəndələr Palatası D.Trampa qarşı impiçment maddələrini Senata göndərib

ABŞ Nümayəndələr Palatası dünən impiçment maddələrini Senata göndərib. Bu maddələrdə sabiq Prezident Donald Tramp yanvarın əvvəllərində Konqres binasına hücuma görə üsyana təhrikdə ittiham olunur. Bu barədə “Amerikanın səsi” radiosu məlumat yayıb.

Xəbərdə qeyd olunur ki, Senatda məhkəmənin başlanması 8 fevrala təyin olunub. Bu tarix Demokratlar və Respublikaçılar arasında həm qanunvericilər, həm də D.Trampın vəkillərinə məhkəməyə hazırlaşmaq üçün əlavə vaxt vermək barədə razılıq əldə olunduq­dan sonra müəyyən edilib.

D.Trampın rəsmən im­piçment elan edilməsi üçün Senatda üçdə iki çoxluğun razılığı tələb olunur. Hazırda Senatda Respublikaçılar­la Demokratlar arasında mandat nisbəti 50:50-yə nisbətindədir. Beləliklə, bütün Demokratların razılığı nəzərə alınmaqla, əlavə olaraq 17 Respublikaçının D.Trampın məhkum edilməsinə səs verməsi tələb olunur. Əgər Senat D.Trampa qarşı im­piçmenti təsdiq edərsə, ona bir də yenidən federal vəzifə tutmaq qadağan oluna bilər.

Xatırladaq ki, D.Tramp yeganə ABŞ prezidentidir ki, ölkənin 245 illik tarixində iki dəfə impiçment olunub. Se­natda Demokrat çoxluğun li­deri Cak Şumer məhkəmənin vacibliyini vurğulayaraq, onun sürətlə keçəcəyini proqnozlaşdırıb.

“Hamı Amerika tarixindəki bu bədnam səhifəni arxada qoymaq istəyir. Lakin onun “palaz altına süpürülməsi” bizə şəfqət gətirməyəcək,” – deyə Şumer bildirib.

Məsaim ABDULLAYEV, “Xalq qəzeti”