Köhnə versiya

Ən son xəbərlər

Son buraxılış
Arxiv

Bakı Ali Neft Məktəbində “Qarabağın təbii sərvətləri” mövzusunda vebinar

Bakı Ali Neft Məktəbi, Ekologiya və Təbii Sərvətlər Nazirliyinin birgə təşkilatçılığı ilə “Qarabağın təbii sərvətləri” mövzusunda vebinar keçirilib. Vebinarda Qarabağın zəngin təbii sərvətləri barədə geniş müzakirələr aparılıb.

BANM-dan verilən məlumatda bildirilir ki, müxtəlif yerli, transmilli şirkətlərdən, təhsil müəssisələrindən, idarə və təşkilatlardan 700 nəfərin iştirak etdiyi vebinarda Bakı Ali Neft Məktəbinin rektoru Elmar Qasımov, Milli Məclisin Təbii ehtiyatlar, energetika və ekologiya komitəsinin sədri deputat Sa­diq Qurbanov, Ekologiya və Təbii Sərvətlər Nazirliyinin Milli Geoloji Kəşfiyyat Xidmətinin rəisi Əli Əliyev və Bakı Ali Neft Məktəbinin Neft-Qaz mühəndisliyi kafedrasının dosenti Qəşəm Zeynalov məruzəçi qismində çıxış ediblər.

Bakı Ali Neft Məktəbinin rektoru Elmar Qa­sımov bildirib ki, Ermənistanın Azərbaycan tor­paqlarını zəbt etməsinin əsas səbəblərindən biri də bu ərazilərin təbii sərvətlərlə, o cümlədən su, meşə, torpaq ehtiyyatları ilə zəngin olmasıdır.

Rektor qondarma Dağlıq Qarabağ rejimi tərəfindən qəbul edilən təbii sərvətlər və onun istifadəsinə dair bir çox fərman və sərəncamın təbii sərvətlərimizin talanmasına xidmət etdi­yini vurğulayaraq, ali məktəblərin öz profilinə uyğun olaraq Qarabağın tarixinə, turizim və logistik imkanlarına dair araşdırma aparmasını təklif edib.

Milli Məclisin Təbii ehtiyatlar, energetika və ekologiya komitəsinin sədri Sadiq Qur­banov milyardlarla ABŞ dolları gəlir gətirən mineral-xammal ehtiyatlarımızın ermənilər tərəfindən talan edildiyini qeyd edib. Deputat faydalı qazıntıların talan olunması nəticəsində dəymiş zərərin məbləğinin dəqiq araşdırmalar nəticəsində müəyyən ediləcəyini bildirib.

Ekologiya və Təbii Sərvətlər Nazirliyinin Milli Geoloji Kəşfiyyat Xidmətinin rəisi Əli Əliyev qeyd edib ki, Ermənistan tərəfindən işğal edilmiş ərazilərimizdə işğaladək olan dövrdə eh­tiyatları təsdiq olunmuş 163 müxtəlif növ faydalı qazıntı yatağı, o cümlədən: 4 qızıl, 7 civə, 2 mis, 1 qurğuşun və sink, 1 daş kömür, 7 gəc, 4 vermikulit, 1 soda istehsalı üçün xammal, 12 əlvan və bəzək daşları (obsidian, mərmərləşmiş oniks, yəşəm və s.), 10 mişar daşı, 21 üzlük daşı, 10 gil, 21 sement xammalı, 8 müxtəlif növ tikinti daşları, 6 əhəng xammalı, 11 qum-çınqıl, 4 tikinti qumu, 1 perlit, 8 pemza-vulkan külü, 16 yeraltı şirin su və 10 mineral su yatağı mövcud olub.

Xidmət rəisi Azərbaycan Respublikasının erməni silahlı qüvvələri tərəfindən işğal olun­muş ərazilərində ümumiyyətlə, 561 yataq və perspektivli minerallaşma sahəsinin müəyyən edildiyini diqqətə çatdırıb.

Vebinarda qeyd edilib ki, Prezident İlham Əliyevin tapşırığına əsasən, işğal olunmuş ərazilərimizdə Ermənistanın Azərbaycana vurduğu zərərlərin -- vətəndaşların mülkiyyəti, infrastruktur, mədəniyyət abidələri və s. ilə yanaşı, həm də Azərbaycana məxsus təbii resursların qeyri-qanuni istismarı haqqında kompleks qiymətləndirilmə aparılır. Məqsəd sərvətlərimizin talan edilməsi siyasətini həyata keçirən düşmən ölkənin siyasi rəhbərliyinin məsuliyyətə cəlb olunması ilə bağlı bütün lazımi tədbirləri həyata keçirməkdir.

Tədbir sual-cavab sessiyası ilə yekunlaşıb.

“Xalq qəzeti”

23 Yanvar 2021 02:13 - XƏBƏRLƏR
XƏBƏRLƏR
20 Fevral 2021 | 06:34
Tərtərdə elmi-praktik seminar

Köhnə versiyamızdan xəbərləri izlə