Merkel Bayden ilə dialoqun daha asan olacağını düşünür

Almaniya Kansleri Angela Merkel Ağ evin əvvəlki administrasiyası ilə müqayisədə ABŞ-ın yeni Prezidenti Co Baydenlə bir çox mühüm məsələlər üzrə razılaşmaq imkanının daha çox olduğunu deyib. Bu barədə Berlindəki rəsmi mənbələrə istinadən “Amerikanın səsi” radiosu xəbər verib.

Angela Merkel, eyni za­manda hesab edir ki, Alma­niya və Avropanın keçmişdə olduğu kimi, ABŞ-ın hərbi və maliyyə yardımına bir o qədər də ehtiyacı yoxdur. Siyasi təhlilçilər C.Baydenin D.Trampdan fərqli olaraq Av­ropa İttifaqı (Aİ) ilə əlaqələri gücləndirəcəyini düşünürlər. ABŞ-ın yeni Prezidenti bu barədə mövqeyini özünün seçkiqabağı kampaniyası zamanı dəfələrlə bildirib.

A.Merkel Berlində jurnalistlərə deyib ki, Ağ evin yeni sahibinin inauqu­rasiyadan sonra imzaladığı sərəncamlar göstərir ki, onunla konstruktiv dialoq aparmaq çətin olmayacaq. Almaniya Kansleri ABŞ Prezidentinin Ümumdün­ya Səhiyyə Təşkilatında (ÜST) qalmaq və Paris iqlim razılaşmasına yenidən qoşulmaq qərarını, eləcə də mühacir problemləri ilə bağlı fikirlərini dəstəkləyir. Kansle­rin fikrincə, Almaniya həmin sahələr üzrə gələcəkdə Ağ ev ilə birlikdə uğurla çalışa biləcək. Lakin o, C.Bayden ilə bütün məsələlərdə tam razılığın əldə olunacağını istisna edib.

Xatırladaq ki, A.Merkelin ABŞ-ın keçmiş dövlət baş­çısı D.Tramp ilə münasibəti gərgin olub. Kansler etiraf edib ki, D.Trampın prezident­liyi dövründə Almaniya və Aİ rəhbərliyi diplomatik və hərbi sahələrdə ABŞ-a “bir o qədər də güvənməyib”.

“Ancaq yaxşı xəbər budur ki, Almaniya və Aİ rəsmiləri ABŞ ilə əməkdaşlığa ha­zırdırlar. Lakin əməkdaşlıq qarşılıqlı etimada əsaslanır”, – deyə A.Merkel xəbərdarlıq edib.

Məsaim ABDULLAYEV, “Xalq qəzeti”