İspaniya Türkiyə ilə Aİ arasında əlaqələrin güclənməsini arzulayır

“Rəsmi Madrid Türkiyənin təkcə İspaniya ilə deyil, bütövlükdə, Avropa İttifaqı (Aİ) ilə münasibətlərinin möhkəmlənməsində maraqlıdır”. Belə bir bəyanatla İspaniyanın Baş naziri Pedro Sançes çıxış edib. Bu barədə “Anadolu” agentliyi məlumat yayıb.

İspaniya hökumətinin rəhbəri ölkəsini xaricdə təmsil edən səfirlər qarşısında çıxış edərkən deyib ki, Aİ rəhbərliyi NATO-nun aparıcı ölkələrindən biri olan Ankara ilə pozitiv gündəm qurmağa borcludur.

P.Sançes sonra vurğulayıb ki, İspaniya Avropa ölkələri arasında Türkiyə ilə kons­truktiv dialoqun qurulmasının lehinə olan dövlətlərin ilk sıralarındadır. Madrid hesab edir ki, Ankara Avropanın təhlükəsizliyində mühüm rol oynayır və bu amil lazımınca dəyərləndirilməlidir.

Yeri gəlmişkən, 2021-ci ilin ikinci yarısında Türkiyə- İspa­niya Hökumətlərarası Komis­siyanın sammiti keçiriləcək. Bu barədə razılıq yanvarın 8-də Madriddə səfərdə olan Türkiyənin Xarici İşlər naziri Mövlud Çavuşoğlunun İspa­niya rəsmiləri ilə apardığı da­nışıqlar zamanı əldə olunub. P.Sançes sözügedən tədbirin Ankara ilə Madrid arasında hərtərəfli əlaqələrin inkişafına impuls verəcəyini bildirib.

Qeyd etmək lazımdır ki, Türkiyə ilə İspaniya arasında təkcə iqtisadi sahədə deyil, digər istiqamətlərdə, xüsusilə yeni koronavirus pandemiyası ilə mübarizə sahəsində də əlaqələr genişlənir. İspaniya hazırda Avropada pandemi­yadan ən çox əziyyət çəkən dövlətlərdən biridir. Ölkədə son bir gün ərzində 40 mindən çox koronavirusa yoluxma faktı qeydə alınıb.

İspaniya Səhiyyə Na­zirliyinin məlumatına görə, ölkədə koronavirusa yoluxan­ların sayı 2 milyon 252 min 164 nəfərə, bu xəstəlikdən ölənlərin sayı isə 53 min 314 nəfərə bərabərdir.

Məsaim ABDULLAYEV, “Xalq qəzeti”