ATMU və IMC Krems Tətbiqi Elmlər Universiteti arasında əlaqələr möhkəmlənir

Avstriya Respublikasının ölkəmizə yeni təyin olunan fövqəladə və səlahiyyətli səfiri Tomas Şuller Qötzburq Azərbaycan Turizm və Menecment Universitetində (ATMU)  olub.

ATMU-nun rektoru İlham Mədətov, Beynəlxalq əlaqələr şöbəsinin müdiri Orxan Musa və Dövlət Turizm Agentliyinin Təhsil və təlim sektorunun müdiri Arzu Tairquliyeva-Nağıyevanın iştirakı ilə keçirilən görüşdə təhsil və tədrisin təşkili, inkişaf strategiyası məsələlərinə aydınlıq gətirilib.

Rektor İ.Mədətov ATMU və IMC Krems Tətbiqi Elmlər Universiteti arasında 15 il əvvəl bağlanan Azərbaycan- Avstriya Turizm Proqramının uğurlu təhsil siyasəti olduğu bildirilib. Söhbət əsnasında adıkeçən proqram çərçivəsində ixtisaslı kadrların hazırlanması işinin səmərəli təşkili, təhsilin keyfiyyəti, rəqabətliliyin artırılması məsələlərinə xüsusi önəm verilib.

Cənab səfir Azərbaycan-Avstriya Turizm proqramı üzrə tədrisə məsul əcnəbi müəllim-professor heyəti ilə görüşüb. AATP-da təhsil alan tələbələri salamlamaqdan məmnunluğunu bildirib.Turizm sahəsi üzrə ixtisaslı kadr kimi tanınmağı məqsəd bilən tələbələrə müasir bilik və peşəkar vərdişlərdən faydalanmağı tövsiyə edib.

Z.BƏŞİRQIZI, “Xalq qəzeti”