Xarici xəbərlər

Türkiyə

“ROKETSAN” rəhbərinin açıqlaması

Türkiyənin yeni nəsil qanadlı raketi “Çakır” cari ilin sonunda buraxılacaq. Bu barədə “ROKETSAN” şirkətinin baş direktoru Murat İkinci açıqlama verib. O, bildirib ki, “ROKETSAN”-ın şüarı dənizin dibindən kosmosun dərinliklərinə qədər müdafiə üçün lazım olan bütün texno­logiyaları inkişaf etdirə biləcək infrastruktur yaratmaqdır.

Məlumatı “Anadolu” yayıb.

ABŞ

Ranço satılır

ABŞ-ın Vayominq ştatında Uolt Disney ailəsinə məxsus olmuş ranço satışa çıxarılıb. Rançonun dəyəri 71 milyon dollar təşkil edib. “Hall and Hall” hüquq firmasının sözçüsü Cim Taylor malikanə barədə məlumat verərək bildirib ki, Yellouston Milli Parkından təxminən 37 kilometr məsafədə yerləşən imarət 2 min hektara yaxın ərazini əhatə edir. O əlavə edib ki, ərazi üç tərəfdən dağ zirvələri ilə əhatə olunub.

Məlumatı “The Wall Street Journal” yayıb.

Avstraliyaya dörd “B-2 Spirit” yerləşdirilib

ABŞ Hərbi Hava Qüvvələri Asiya Sakit okean hövzəsində artan gərginlik fonunda Avstraliyaya daha dörd ədəd “B-2 Spirit” strateji bom­bardmançı təyyarə yerləşdirib. Qeyd edək ki, indiyədək ABŞ Avstraliyada “B-2 Spirit” donan­masının 20 faizini yerləşdirib. Bildirilib ki, təyyarənin ikisi ABŞ-dan Avstraliyaya iyulun 10-da, daha ikisi isə iyulun 12-də gedib.

Xəbəri “The Drive” verib.

Rusiya

Bədbin proqnoz

Rusiyanın İqti­sadi İnkişaf Nazir­liyi payızda ölkədə işsizliyin hazırkı 3,9 faizlə müqayisədə artacağını proq­nozlaşdırıb. Bu barədə açıqlama verən Rusiyanın iqtisadi inkişaf naziri Maksim Reşetnikov bildirib ki, hazırda ölkənin əmək bazarında vəziyyətə nəzarət etmək mümkündür. Lakin o deyib ki, payızda ölkədə işsizlik nəticəsində bu rekord aşağı səviyyədən uzaqlaşacaq.

Məlumatı TASS yayıb.

İngiltərə

Müqavilə yenilənib

İngiltərənin “Liverpul” klubu hücumçusu Dioqo Jota ilə yeni müqavilə imzalayıb. 25 yaşlı oyunçu ilə müqavilənin müddəti 2027-ci ilin yayınadək uzadılıb. Qeyd edək ki, Jota 2020-ci ilin sentyabrından “Liverpul”da çıxış edir. Portu­qaliyalı futbolçu komandanın heyətində 85 oyunda 34 qol vurub və 9 məhsuldar ötürmə edib.

Xəbəri “Eurosport” verib.

Hazırladı: Elçin ABBASOV, “Xalq qəzeti”