Köhnə versiya

Ən son xəbərlər

Son buraxılış
Arxiv

Hərə öz işində ayıq-sayıq olsa...

Başına gələn başmaqçı olarmış. Önəmli beynəlxalq tədbirlər ərəfəsində Azərbaycan Respublikasına qarşı planlaşdırılan “qara piar” və informasiya kampaniyaları yadımızdan çıxmayıb. Axı, yadımızdan çıxarmağa heç macalımız olmur. Çünki həm ölkəmizdə beynəlxalq tədbirlər tez-tez keçirilir, həm də bizə qarşı olanlar öz xasiyyətlərindən, tutduqları mövqedən əl çəkmirlər...

Xatırladaq ki, respublikamız­da keçirilən önəmli beynəlxalq tədbirlər ərəfəsində bizi xarici aləmdə, beynəlxalq ictimai fikirdə, informasiya məkanında neqativ fonda göstərən süni “gündəm” yaratmaq cəhdləri öncələr də olub. Təəssüf ki, indi də var, bu “süni gündəm”çilərin gələcəkdə (ən azı yaxın gələcəkdə) öz işinə da­vam etməyəcəyinə tam zəmanət yoxdur.

2012-ci ildəki “Avroviziya” mahnı yarışması ərəfəsində Bayılda iki binanın sakinlərinin köçürülməsi ilə bağlı vətəndaşların mülkiyyət hüququnun pozulması mövzusu, 2015-ci ilin I Avropa Oyunları dövründə “Guardian”ın əməkdaşı Ouen Gibsona, özünü “Red Pepper” nəşrinin əməkdaşı kimi təqdim edərək saxtakarlıq törədən Emma Hyuza akkreditasi­ya verilməməsi, habelə “Formula –1” yarışları ərəfəsində (sanki sifariş verilibmiş kimi!) bəziləri tərəfindən itlərə qarşı qəddarlıq hallarının baş verməsi və bu barədə videokadrların tirajlan­ması, 2018-ci ildə futbol üzrə Avropa Liqasının Bakıda keçirilən final oyunu ərəfəsində “Arsenal” klubunun oyunçusu Henrix Mxi­taryanın Azərbaycana gəlməkdən imtinasının gündəm edilməsi (və Azərbaycanın ittiham hədəfinə çevrilməsi), həmçinin digər vacib beynəlxalq iqtisadi, siyasi, huma­nitar tədbirlər ərəfəsində ölkəmizə qarşı təşkil olunan neqativ infor­masiya kampaniyaları... bir deyil, beş deyil...

Ayrıca, hər dəfə “Formula –1”- in Bakı yarışması ərəfəsində “Hey­vanlara qarşı qəddarlıq” mövzusu gündəmə gətirilib və küçələrdə itlərin öldürülməsi barədə məlumatlar ictimailəşdirilərək, bunun ətrafında böyük beynəlxalq kampaniya qondarılıb...

Bəli, “Xarıbülbül” folklor festivalını uğurla başa vuran ölkəmizdə yaxın günlərdə daha üç beynəlxalq tədbir keçiriləcək: 1. “Texnofest –2022” festivalı, 2. “Formula –1” yarışması və 3. Qlobal Bakı Forumu.

Bu beynəlxalq tədbirlər ərəfəsində yenə ənənəvi vasitələrdən istifadə müşahidə olunur. Budur, artıq rayonlardan birində itlərin öldürülməsi xəbəri tirajlanmağa başlayıb.

Başqa misal: süni gündəm yaratmağa həvəs və ma­raq kimi, bir neçə gün öncə paytaxtın mərkəzindəki bir yarımaksiyada LGBT-nin bay­raqlarının qaldırılmasını təsadüf saymaq olarmı? Həmin aksiya­dan sonra bir sıra beynəlxalq təşkilatlar Azərbaycanda “LGBT hüquqları”nın pozulması barədə bəyanatlarla, xarici media isə mü­vafiq materiallarla çıxış edib...

Növbəti beynəlxalq tədbirlərin keçiriləcəyi ərəfədə “loqossuz və etossuz mövzular”dan daha aktiv şəkildə (“pafosla”) sui-istifadə olunacağı şübhə doğurmur. Deyirəm, görəsən bu dəfə harada it güllələyəcəklər? Yoxsa, hansısa ictimai fəala, jurnalistə qarşı nə isə törədiləcək, kiminsə burnu qanadı­lacaq ya da qolu burxulacaq?..

Bəlkə, daha kreativ bəhanə tapacaqlar – nə bilmək olar? Bircə onu bilirəm ki, hər kəs öz mövqeyində, hərə öz iş-gücünün başında ayıq-sayıq olsa, ölkəmizə qarşı planlaşdırılan hoqqaları pozmuş olarıq. “Ən vətənpərvər insan öz işini yaxşı görən insan­dır”. Sorospərvər, Qumpərvər, Kremlpərvər, fransızpərvər, X – pərvərlər... öz “işlərində” sabitqədəmdirlərsə, atılacaq ad­dım, gediləcək yol, əldə ediləcək uğur mahiyyəti ilə açıq aydındır.

Əkbər QOŞALI

25 May 2022 02:13 - SİYASƏT
SİYASƏT

Köhnə versiyamızdan xəbərləri izlə