Köhnə versiya

Ən son xəbərlər

Son buraxılış
Arxiv

Bu virusa qarşı vaksinasiya mövcuddur

Hazırda bir neçə ölkədə yoluxma faktı aşkarlanmış “meymun çiçəyi” məlum çiçək xəstəliyinin bir növüdür. İnsandan insana yoluxma faktı daha azdır. Mərkəzi və Qərbi Afrika ölkələri, ABŞ, Böyük Britaniya, Portuqaliyada qeydə alınan “meymun çiçəyi”-nin ölkəmizdə yoluxma halları aşkarlanmayıb. Ümumiyyətlə, bu simptomla bağlı heç bir müraciət daxil olmayıb. Bu fikirləri “Xalq qəzeti”nə TƏBİB-in İnfeksion nəzarətin təşkili şöbəsinin müdiri Nəzrin Mustafayeva deyib.

O, bildirib ki, xəstəlik virus mənşəlidir: “Daha çox hallarda heyvandan insana, daha az hallarda isə insan­dan insana yoluxma halları müşahidə olunub. Əsas simptomları yüksək hərarət, əzələ ağrıları, boğaz ağrıları, bəzi hallarda öskürək, dəri səpkiləri, qaşıntılardır. Yo­luxma tənəffüs yollarından xaric olan damcılar vasitəsilə, dəri səpkilərinin möhtəviyyatı və sıx təmas yolu ilə baş verir. Çiçək virusuna nisbətən “meymun çiçəyi” virusunun törətdiyi xəstəliyin gedişatı daha yüngüldür, eləcə də, yoluxduruculuq qabiliyyəti də zəifdir”.

Nəzrin Mustafayeva həmçinin vurğulayıb ki, bu virusa qarşı vaksinasiya da mövcuddur: “Çiçək xəstəliyinə qarşı olan vaksinlər də öz effektini göstərir. Spesifik müalicəsi yoxdur, adətən 2-4 həftə ərzində öz-özünə sağalan bir xəstəlik hesab edilir. Yoluxduruculuq qabiliyyətinin çox aşağı olması səbəbindən xəstəliyin pandemiya halını alması da zəif ehtimaldır. Lokal olaraq bəzi yerlərdə epidemi­ya kimi müşahidə oluna bilər. Əvvəlki dövrlərdə də bu virusa yolux­ma halları olub. Amma son zamanlarda çiçək virusuna qarşı apa­rılan profilikatik vasitələr hər iki xəstəliyin azalmasına səbəb olub. Su çiçəyi və “meymun çiçiyəni”nin klinik əlamətləri arasında oxşar və fərqli əlamətlər var. 90 faiz simptomlar bir-birinə bənzəyir. Fərqi ondan ibarətdir ki, “meymun çiçəyi” xəstəliyində limfa düyünlərinin böyüməsi, şişkinliyi hallarına daha çox rast gəlinir. “Meymun çiçəyi” xəstəliyi su çiçəyinə nisbətən daha yüngül əlamətlərlə müşahidə olunur”.

Şahxanım ƏLİZADƏ,

“Xalq qəzeti”

22 May 2022 00:00 - SƏHİYYƏ
SƏHİYYƏ

Köhnə versiyamızdan xəbərləri izlə