Köhnə versiya

Ən son xəbərlər

Son buraxılış
Arxiv

“Elmi məqalənin nüfuzlu jurnalda nəşrə hazırlanması” mövzusunda seminar

“Springer Nature” beynəlxalq nəşriyyatı və Azərbaycan Respublikasının Prezidenti yanında Elmin İnkişafı Fondunun (EİF) təşkilatçılığı ilə “Elmi məqalənin nüfuzlu jurnalda nəşrə hazırlanması” mövzusunda birgə müəllif seminarı keçirilib. AMEA-nın Mərkəzi Elmi Kitabxanasında (MEK) baş tutan tədbirdə akademiyanın elmi müəssisə və təşkilatlarının əməkdaşları, Azərbaycanın ali təhsil müəssisələrinin nümayəndələri, gənc alimlər, mütəxəssislər, həmçinin doktorant, dissertant və magistrlər iştirak ediblər.

Seminarı EİF-in icraçı direktoru, fizika-riyaziyyat üzrə fəlsəfə doktoru Elçin Babayev açaraq ölkəmizdə aparılan elmi tədqiqatların beynəlxalq miqyasda önəmindən, Azərbaycan elminin dünyada təbliğindən, alimlərimizin elmi nəticələrinin aparıcı impakt faktorlu jurnallarda çapı üçün yaradılan şəraitdən danışıb. O, elmi məqalələrin müasir standartlara uyğun, lakonik və dolğun şəkildə yazılmasının xüsusi önəm kəsb etdiyini, “Springer Nature” şirkəti ilə əməkdaşlığın Azərbaycan alimlərinə faydalı olacağını bildirib.

.Tədbirdə çıxış edən MEK-in direktoru, tibb üzrə fəlsəfə doktoru Leyla İmanova Elmin İnkişafı Fondu ilə Milli Rəqəmsal Yaddaş Bazasının zənginləşdirilməsi istiqamətində əməkdaşlıq etdiklərini qeyd edib. Seminarın mövzusunun əhəmiyyətli olduğunu deyən L.İmanova 2014-cü ildə 20, 2015-ci ildə isə 60 məqalənin şirkətin ekspertlərinin təkrar qiymətləndirilməsi zamanı “Springer” elmi bazasından çıxarıldığını bildirib və alimləri məqalə hazırlayan zaman diqqətli olmağa səsləyib.

Daha sonra “Springer Nature” şirkətinin Lisenziyalaşdırma müdiri Merve Okur Karagülle təmsil etdiyi qurumun profili, Azərbaycanda tədqiqatların nəticələri, eləcə də Azərbaycan və “Springer Nature” əməkdaşlığının perspektivləri haqqında çıxış edib. O, “Springer Nature”nin tədqiqatçıların, tələbələrin, müəllimlərin və mütəxəssislərin ehtiyaclarına xidmət edən dünyanın ən aparıcı akademik və tədris nəşriyyatı olduğunu söyləyib. Qeyd edib ki, hər il nəşriyyata 1 milyona yaxın məqalə təqdim olunur və onlardan 300 mini 3 min jurnal və 13 min kitabda işıq üzü görür. M.O.Karagüllə ölkəmizdən nəşriyyata ən çox məqalənin Azərbaycan Milli Elmlər Akademiyasının alimləri tərəfindən göndərildiyini, növbəti yerlərdə isə Təhsil Nazirliyi və Bakı Dövlət Universitetinin qərarlaşdığını bildirib.

Seminarda, o cümlədən “Springer Nature” şirkətinin satış direktoru Şahin Girayisə iki sessiya ərzində effektiv əlaqələndirici olmağın yolları və məqalə əlyazmasının çapa hazırlanması, həmçinin  düzgün elmi jurnal seçimi və elmi məqalənin çap üçün təqdim olunma prosesi haqqında təlim keçib.

www.science.gov.az saytı yazır ki, sonda iştirakçıları maraqlandıran suallar cavablandırılıb.

 

Əlipənah BAYRAMOV,
“Xalq qəzeti”

5 Dekabr 2018 17:17 - ELM
ELM

Köhnə versiyamızdan xəbərləri izlə