Köhnə versiya

Ən son xəbərlər

Son buraxılış
Arxiv

Xarici iştirakçıların hər statusu Şuşa gözəlliyini dünyaya yayacaq

 Şuşa, həm yerli, həm də xarici qonaqlara yenə qucaq açdı. Yenə çal–çağır səsi Cıdır düzünü bəzədi. Yenə o taydan bu büsata baxıb köks ötürən, diş qıcayanların, bir zamanlar o müqəddəs torpaqda yallı gedənlərin arzu – istəyi gözündə qaldı. Şusa bayram libasına bürünmüşdü. İşğaldan azad ediləndən sonra növbəti müsiqi festivalının sədaları ətrafa yayılırdı. Ötənilki və builki festival iştirakçılarından publisist Əkbər Qoşalının bu təntənə ilə bağlı fikirlərini öyrəndik. O dedi:

   – Mayın 11-də Şuşada şəhər işğaldan azad olunduqdan sonra ikinci dəfə, ümumilikdə, beşinci dəfə “Xarıbülbül” folklor festivalı keçirildi. Ötən il – Şuşanın azad olunmasının ardından keçirilən festivalda ölkəmizin fərqli ansamblları, musiqi qrupları yaddaqalan çıxışlar etdi. Beşinci festival isə beynəlxalq səviyyədə – Azərbaycan ilə yanaşı ayrı–ayrı ölkələrdən gələn folklor quruplarının iştirakı ilə keçirildi. Məsələn, biz qardaş Türkiyənin, Özbəkistanın, Pakistanın, Malinin, Tunisin, Gürcüstanın folklor qruplarını, xalq rəqslərini seyr etdik, çox maraqlı idi. Maraq dediyimiz yalnız musiqi nömrələrinin, rəqslərin, etnoqrafik etüdlərin nümayişi ilə bağlı deyildi. Həmin gün Şuşada yağış vardı, amma heç kim festivalı tərk etmək fikrində deyildi və nəinki fikrində deyildi, faktiki olaraq, hər kəs proqram başa çatana qədər Cıdır düzündə yağışı nur damlaları kimi qəbul etdi. Sanki təbiət də bizi alqışlayırdı. Və yarızarafat, yarıciddi deyirdi ki, Şuşanın yağışından bizə ziyan yox, xeyir gələr.

Əkbər Qoşalı, xüsusilə vurğuladı ki, hər musiqiçi, folklor qrupu öz sosial media hesabında Şuşadan bir paylaşım etsə, bir “tvit” atsa, bir “status” yazsa, ayrı–ayrı ölkələrdən gələnlər Şuşanın görməli yerlərindən şəkil yaysa, bunun özü dünyanın dörd tərəfində Şuşa adını, Şuşa gözəlliyini tirajlayacaq, Şuşaya, Qarabağa, Azərbaycana və həqiqətlərimizə diqqət çəkəcək. Ümumiyyətlə, bu işin bədii zövq, sənət, təcrübə mübadiləsi, yeni tanışlıqlar baxımından önəmi öz yerində, daha önəmlisi odur ki, Şuşada abadlıq işlərinin aparılmasından az müddət keçsə də, beynəlxalq festival keçirilə bilir. Bəzən ölkələr illərlə beynəlxalq festivalı təşkil edə bilmir, biz isə Şuşada artıq belə bir festivalı keçiririk. Bilirsiniz, bu il “Şuşa ili”dir, başqa tədbirlər də olacaq. Elə bilirəm, ali dövlət rəhbərliyinin, dövlətimizin müvafiq orqanlarının, Heydər Əliyev Fondunun həyata keçirdiyi tədbirlər Şuşanın həm Azərbaycanın Mədəniyyət paytaxtı, Qafqazın konservatoriyası, gələn il Türk dünyasının Mədəniyyət paytaxtı, o biri il İslam dünyasının Mədəniyyət paytaxtı olması etibarilə, bu dağlar incisinin adından dünyada geniş bəhs etdirəcək.

Şuşa adını xüsusi şövqlə çəkən Ə.Qoşalı onun ən gözəl səsləndirilməsinin müəllifinin Ali Baş Komandan olduğunu söylədi:

  – Şuşadan başqa Şuşa yoxdur. Şuşa Azərbaycanın o şəhəridir ki, dövlət başçımız onun adını “əziz Şuşa” – deyə tərif edib. Cənab Prezident, müzəffər Ali Baş Komandan “Əziz Şuşa, sən azadsan!”, “Əziz Şuşa, biz səni dirçəldəcəyik!” vədini bugünkü, bundan öncəki və nəzərdə tutulan başqa tədbirlərlə, geniş planlarla praktik müstəviyə keçirməkdədir. Bu praktik müstəviyə keçən işlər Şuşanın böyük gələcəyini göstərir. 270 yaşlı şəhərimiz əslində 270 ilə sığmayan, 30 illik işğalda öz qürurunu sındırmayan və işğaldan azad olunduqdan sonrakı illərdə sürətlə özünə qayıdan bir şəhər siqləti ilə seçilməkdədir. Bəlkə də biz belə yaraşdırırıq, metaforlara varırıq, amma Şuşaya bütün gözəlliklər yaraşır.

 

Söhbətləşdi:

Zərifə BƏŞİRQIZI,

“Xalq qəzeti”

20 May 2022 12:39 - SİYASƏT
SİYASƏT

Köhnə versiyamızdan xəbərləri izlə