Almaniya Kansleri Finlandiyanın NATO-ya üzvlüyünü dəstəkləyib

Almaniya Kansleri həmçinin bildirib ki, Finlandiya Prezidenti Sauli Niinistö ilə telefon danışığı zamanı onu Almaniya hökumətinin Finlandiyaya tam dəstəyi ilə bağlı əmin edib. Qeyd edək ki, Fin­landiya Rusiyanın Ukraynaya hücumun­dan sonra ölkənin milli təhlükəsizliyini təmin etmək üçün NATO-ya üzv olmaq niyyətindədir. Rəsmi Moskva isə bunu özünün təhlükəsizliyinə təhdid hesab edir. Yeri gəlmişkən, Finlandiya Prezi­denti Sauli Niinistö isə “Twitter” hesabın­dakı paylaşımında Almaniyaya dəstəyə görə minnətdar olduğunu qeyd edib. Əlavə edib ki, tərəflər söhbət zama­nı Ukraynada sülhə nail olunmasının zəruriliyini müzakirə ediblər.

Xatırladaq ki, iki gün əvvəl Böyük Britaniyanın Baş naziri Boris Conson İsveç və Finlandiyaya səfər edərək, bu ölkələrin hökumət başçıları ilə müzakirələr aparıb. Böyük Britaniya ilə hər iki ölkə arasında təhlükəsizlik haqqında saziş imzalanıb.

Böyük Britaniya hökumətinin bu addımı rəsmi Vaşinqton tərəfindən birmənalı olaraq dəstəklənib. ABŞ-da hesab edirlər ki, Rusiya təhlükəsinə qarşı kollektiv Qərb birgə fəaliyyət göstərməlidir.

Mahmud QƏRİBOV,

“Xalq qəzeti”