Köhnə versiya

П.новости

Son buraxılış
Arxiv

Vasili Nebenzya: Azərbaycan Prezidentinin təşəbbüsü zəruri sayda BMT üzvləri tərəfindən dəstəklənib

BMT Baş Assambleyasının koronavirusa həsr edilmiş xüsusi sessiyasında müzakirələr yaxın vaxtda başlanacaq. Bu xüsusi sessiyanın keçirilməsi təşəbbüsü ilə Azərbaycan Prezidenti İlham Əliyev çıxış edib.

AZƏRTAC xəbər verir ki, Rusiyanın BMT-dəki daimi nümayəndəsi Vasili Nebenzya bu sözləri TASS Agentliyinin Baş direktorunun birinci müavini Mixail Qusmana müsahibəsində söyləyib.

V.Nebenzya bir məqama diqqəti cəlb edib ki, pandemiya hamını qəfildən yaxalayıb. O deyib: biz buna hazır deyildik. Birtəhər uyğunlaşmışıq, lakin iqtisadi, siyasi, sosial, tibbi və yəqin ki, psixiatrik nəticələrin hamısını bilmirik. Əgər yaxın gələcəkdə normal həyat ritminə qayıdacağımızı bilsəydik, sual olmazdı – Baş Assambleyanın zalında toplaşıb belə bir sessiya keçirərdik, lakin əgər belə olmasa, biz prosesin təmizliyini hansı prosedurlar vasitəsilə təmin etmək barədə düşünməliyik”. Daimi nümayəndənin sözlərinə görə, bu məsələ yaxın vaxtlarda müzakirə ediləcək.

V.Nebenzya xatırladıb ki, Azərbaycan Prezidentinin təşəbbüsü bu tədbirin təşkil edilməsi üçün zəruri sayda BMT üzvləri tərəfindən dəstəklənib. Lakin bu ideyanın həyata keçirilməsi məhz pandemiya səbəbindən hələlik çətindir. Siyasətçi deyib: “Məsələ modallıqlarla bağlıdır. BMT Baş Assambleyasının videoformatda xüsusi sessiyalarının keçirilməsi sahəsində təcrübəmiz yoxdur. İndi Baş Assambleyanın iclasları keçirilmir. Keçirilən iclaslar BMT-nin bu əsas orqanının rəsmi tədbirləri deyil, ona görə də bu məsələ müzakirə tələb edir.

Vasili Nebenzyanın fikrincə, bu tədbirin təşkili üçün hər cür imkan var. O deyib: “Əgər Baş Assambleyanın xüsusi sessiyası əvəzinə yüksək səviyyəli iclas keçirilməsindən söhbət getsə, belə bir format var. Onun üçün xüsusi prosedur tələb edilmir, belə iclası istəsəniz lap yaxın vaxtda keçirə bilərik. Baş Assambleyanın xüsusi sessiyası isə, əlbəttə, daha sanballı və siyasi əhəmiyyətli tədbirdir və biz həyatın bizə yaradacağı imkanlar və formatlar barədə düşünəcək, baxacaq və ən başlıcası, buna oriyentasiya edəcəyik”.

Xatırladaq ki, Azərbaycan Prezidenti İlham Əliyev Qoşulmama Hərəkatının Təmas Qrupunun Zirvə görüşündə pandemiyaya qarşı mübarizənin müzakirə edilməsi məqsədilə BMT-nin Baş Assambleyasının dövlət və hökumət başçıları səviyyəsində xüsusi sessiyasının keçirilməsi barədə təkliflə çıxış edib.

Fəridə Abdullayeva,
AZƏRTAC-ın xüsusi müxbiri
Moskva

10 2020 12:34 -

Köhnə versiyamızdan xəbərləri izlə