Köhnə versiya

Ən son xəbərlər

Son buraxılış
Arxiv

"Varlığın məntiqinin səlis - qeyri-səlis idrakı"

AMEA-nın İctimai Elmlər Bölməsinin təşkilatçılığı ilə Fəlsəfə İnstitutunun baş elmi işçisi, fəlsəfə elmləri doktoru Zümrüd Quluzadənin "Varlığın məntiqinin səlis - qeyri-səlis idrakı" kitabının müzakirəsinə həsr olunan elmi seminar keçirilib. Ədəbiyyat İnstitutunun Elektron akt zalında baş tutan tədbirdə bölmə üzvləri, müvafiq elmi müəssisələrin rəhbərləri və elmi katibləri iştirak ediblər.

www.science.gov.az saytı yazır ki, seminarı bölmənin akademik-katibi, akademik Nərgiz Axundova açaraq kitab barədə tədbir iştirakçılarına məlumat verib. Bildirib ki, ötən il rus dilində işıq üzü görən vəsait giriş, iki hissə, nəticədən ibarətdir və kitabda müəllifin uzun illər apardığı tədqiqatlar əksini tapıb.

Sonra çıxış edən AMEA-nın vitse-prezidenti, akademik İsa Həbibbəyli Z.Quluzadənin hürufilik, antoqonist cəmiyyətdə üstqurumun rolu, Azərbaycan fəlsəfə tarixi, Şərq - Qərb problemi və digər məsələlərə dair önəmli tədqiqatlar apardığını bildirib. Müəllifin əsərlərinin özünəməxsus modeli ilə seçildiyini deyən İ.Həbibbəyli Z.Quluzadənin aktiv elmi ideyalara sahib olduğunu və bunları hər zaman cəmiyyətlə bölüşdüyünü vurğulayıb.

Daha sonra Z.Quluzadə çıxış edərək təqdim olunan əsərinin mövzusunun uzun illərdir müzakirə olunduğunu, elmi nəzəri konfranslarda gündəmə gətirildiyini, Azərbaycan, Rusiya və Almaniya mətbuatında işıqlandırıldığını söyləyib. Bildirib ki, müasir tədqiqatların səviyyəsi həm elmin, həm də fəlsəfənin bir sıra fundamental məzmununun yenidən nəzərdən keçirilməsini tələb edir. O, bu məsələdə elmlərarası əlaqənin vacibliyinə toxunub, fəlsəfə ilə digər elmlərin üzvü sürətdə bağlı olduğunu deyib.

Tədbirdə, həmçinin Fəlsəfə İnstitutunun direktoru, fəlsəfə elmləri doktoru, professor İlham Məmmədzadə, İqtisadiyyat İnstitutunun direktoru, iqtisad elmləri doktoru, professor Nazim İmanov, AMEA-nın müxbir üzvləri - Könül Bünyadzadə, Akif Musayev, filologiya üzrə elmlər doktoru Tahirə Məmməd və digərləri çıxış edərək fənnlərarası tədqiqatlarda milli ideologiyanın nəzərə alınmasının, elmlərin metodologiyasının hazırlanmasının, eləcə də konkret problemlərin qoyularaq araşdırılmasının, həmçinin Qərb fəlsəfəsini dərindən mənimsəməyin zəruriliyini bildiriblər.

 

Əlipənah BAYRAMOV,
“Xalq qəzeti”

21 Noyabr 2018 17:50 - ELM
ELM

Ən son xəbərləri səhifəmizdən də izləyin