Köhnə versiya

Ən son xəbərlər

Son buraxılış
Arxiv

Əmək Mərkəzi İslam ölkələri arasında əlaqələri inkişaf etdirəcək

Əmək Mərkəzi İslam ölkələri arasında əlaqələri inkişaf etdirəcək

Azərbaycan Respublikasının Prezidenti cənab İlham Əliyev İslam Əməkdaşlıq Təşkilatının (İƏT) Bakı şəhərində beynəlxalq statuslu və ixtisaslaşmış qurumu kimi yaradılması nəzərdə tutulan Əmək Mərkəzinin Nizamnaməsinin təsdiq edilməsi haqqında Qanunu imzalayıb.

İƏT-in Bakı şəhərində yaradılacaq beynəlxalq statuslu Əmək Mərkəzi təşkilatınixtisaslaşmış qurumu olaraq, əmək, məşğulluq, sosial müdafiə və insan kapitalının inkişafı sahəsində üzv dövlətlərin səylərinin birləşdirilməsi, əmək, məşğulluq, sosial müdafiə sahələrində əlaqələrin inkişafı, müvafiq qurumlarının və digər aidiyyəti İƏT təşkilatlarının fəaliyyətinin əlaqələndirilməsi, habelə əməkdaşlıq müstəvisində geniş təcrübə-məlumat mübadilələrinin aparılması məramına xidmət edəcək.

Qeyd edək ki, 2013-cü ilin aprel ayında İƏT-ə üzv dövlətlərin əmək nazirlərinin Bakı şəhərində keçirilmiş ikinci konfransında Azərbaycan Respublikası Prezidenti cənab İlham Əliyevin İƏT-in mənzil-qərargahı Bakı şəhərində olmaqla Əmək Mərkəzinin yaradılması barədə təklifi yekdillə dəstəklənib.

İƏT əmək nazirlərinin 2015-ci ilin oktyabr ayında Cakarta şəhərində (İndoneziya) keçirilmiş üçüncü konfransında Mərkəzin Nizamnamə layihəsi nəzərdən keçirilərək bəyənilib, İƏT Xarici İşlər Nazirləri Şurasının 2016-cı ilin oktyabr ayında Daşkənd şəhərində (Özbəkistan) keçirilmiş 43-cü sessiyasında isə həmin Nizamnamə təsdiq olunub.

Əmək və Əhalinin Sosial Müdafiəsi Nazirliyinin ictimaiyyətlə əlaqələr şöbəsindən aldığımız məlumatda bildirilir ki, Nizamnaməyə əsasən, Əmək Mərkəzinin mənzil-qərargahı Bakı şəhərində yerləşəcək və Nizamnamə 10 üzv dövlət tərəfindən ratifikasiya edildikdən sonra qüvvəyə minəcəkdir.  Artıq Türkiyə və Azərbaycan tərəfindən bu Nizamnamə imzalanaraq ratifikasiya edilib.

 

Z.BƏŞİRQIZI,
“Xalq qəzeti”

29 Oktyabr 2018 17:10 - SİYASƏT
SİYASƏT

Köhnə versiyamızdan xəbərləri izlə