UNESCO-nun Dünya İrsi Festivalı keçirilib

Koreyanın Yeoju şəhərində UNESCO-nun Dünya İrsi Fes­tivalı çərçivəsində "Davamlı gələcək üçün bəşəriyyətin dəyəri" adlı Beynəlxalq onlayn forum və elmi konfrans keçirilib. Tədbirlər UNESCO, Koreya Res­publikasının UNESCO üzrə Milli Komissiyası, Dünya Konfutsi Mədəniyyəti Fondu (WFCC) ilə Xalq Sənəti Beynəlxalq Təşkilatı tərəfindən təşkil olunub.

Forum və elmi konfransda dil, ədəbiyyat, fəlsəfə və dini əhatə edən mövzular üzrə mədəni, regional sərhədlər, sivilizasiyalar-arası mübadilə və müxtəlif qarşılıqlı fəaliyyət növləri, Şərq ilə Qərb ara­sında dialoqda qlobal dəyərlər kimi məsələlər müzakirə mövzusu olub.

Beynəlxalq Türk Mədəniyyəti və İrsi Fondunun prezidenti Gü­nay Əfəndiyeva çıxışında türk­dilli xalqların dünya tarixində və mədəniyyətində əhəmiyyətli rol oyna­dıqlarını, onların bir-birinə ümumi tarixi köklər, ortaq zəngin irs, dil, incəsənət, ədəbiyyat, adət-ənənələr, milli-mənəvi dəyərlərlə bağlı olduq­larını bildirib. Fondun prezidenti həmçinin, ümumtürk mədəniyyətinin dünya mədəniyyətinə böyük töhfələr verdiyini, türkdilli xalqların dahi şəxsiyyətlərinin – mütəfəkkir, yazıçı, şair və alimlərinin bəşəri nailiyyətlər qazandıqlarını vurğulayıb.

Beynəlxalq Türk Mədəniyyəti və İrsi Fondunun Azərbaycan, Qazaxıs­tan, Qırğızıstan və Türkiyənin dövlət başçılarının dəstəyi ilə təsis edildi­yini, keçən il Özbəkistan və Maca­rıstanın da təşkilatın sıralarına daxil olduğunu qeyd edən G.Əfəndiyeva türk mədəni irsinin öyrənilməsi, qorunması, beynəlxalq aləmdə tanı­dılması məqsədi ilə həyata keçirilən tədbirlərdən bəhs edib.

Fondun prezidenti Azərbaycanın ayrılmaz parçası olan Dağlıq Qarabağın mədəni irsindən də söz açıb. Ölkəmizin Dağlıq Qarabağ bölgəsində və ətraf rayonlarda yerləşən tarixi, dini abidələrin, me­marlıq və incəsənət nümunələrinin işğalçılar tərəfindən məhv edildi­yini deyən G.Əfəndiyeva fondun himayəsi ilə bu mövzuda nəşr olunan, habelə Qarabağla bağlı tarixi həqiqətləri diqqətə çatdıran kitabları izləyicilərə nümayiş etdirib.

Fondun müxtəlif ölkələrlə əməkdaşlıq əlaqələri olduğunu bildirən G.Əfəndiyeva Koreya Res­publikası ilə münasibətlərin daha da genişlənməsinin vacibliyini vurğula­yıb.

Qeyd edək ki, onlayn forum və elmi konfransa Qazaxıstan, Özbəkistan, Vyetnam, Butan Krallığının mədəniyyət nazirləri, beynəlxalq təşkilatların rəhbər və nümayəndələri, mütəxəssislər, elm adamları qatılıb.

Tədbirlər həmçinin maraqlı təqdimatlar, musiqi və tamaşaların nümayişi ilə davam edib.

M.MÜKƏRRƏMOĞLU, “Xalq qəzeti”