Yoluxma sayının sürətlə artması bir sıra vətəndaşların məsuliyyətsizliyindən irəli gəlir

Son günlər ölkəmizdə COVID-19 pandemiyasına yolu­xanların artması cəmiyyətdə ciddi narahatlıq yaratmışdır. Dekabrın 1-nə olan məlumata görə, Azərbaycanda koro­navirusa 4426 yeni yoluxma faktının qeydə alınması, 41 nəfərin COVID-19-dan vəfat etməsi əhalinin sağlamlığının qorunması, yoluxma tempinin azaldılması üçün daha sərt tədbirlər görməyi zəruri edir.

Sözsüz ki, son günlər yoluxma sayının getdikcə artmasının səbəbi bir sıra vətəndaşların müəyyən edilmiş qaydalara əməl etməməsi, bəzilərinin səhlənkarlığı ilə əlaqədardır. Təcrübə göstərir ki, hətta, koronavirusa yolux­muş bir sıra sakinlər pandemiyanın yaratdığı təhlükəni tam dərk etmir, qaydaları pozaraq, yaşayış yerini tərk etməklə, təkcə, öz sağlamlıqlarını deyil, həm də ətrafdakı insanların da həyatını təhlükə altına atırlar. Son günlər bir sıra aidiyyatı qurumlar tərəfindən bu cür faktların müəyyən edilməsi halları artmışdır.

Daxili İşlər Nazirliyi mətbuat xidmətinin Gəncə regional qrupun­dan verilən məlumata görə, Gəncə Şəhər Baş Polis İdarəsi (ŞBPİ)və onun tabeliyindəki qurumlarının əməkdaşları koronavirusa yoluxmuş şəxslərin yaşadıqları evləri qanunsuz olaraq tərk etmələrinə qarşı tədbirlər görürlər.

Polis əməkdaşları tərəfindən keçirilən tədbirlər nəticəsində koro­navirus testinin nəticəsi pozitiv çıxan şəhər sakini Aybəniz Abdullayevanın ev şəraitində müalicə almasına baxmaya­raq karantin qaydalarını kobud şəkildə pozması müəyyən edilib. Koronavirusa yoluxmuş həmin xəstənin Tovuz rayo­nuna getməsi aşkarlanıb və müəyyən edilmiş tibbi prosedurlar gözlənilməklə A. Abdullayeva yaşadığı evə göndərilib və onun barəsində Gəncə ŞBPİ-nin İstintaq və Təhqiqat İdarəsində cinayət işi başlanılıb.

Bundan başqa, ŞBPİ Nizami Rayon Polis şöbəsinin əməkdaşları da korona­virus infeksiyasına yoluxmuş şəhər sa­kini Ramil Məmmədovun ev şəraitində müalicə almasına baxmayaraq, karantin qaydalarını kobud şəkildə pozaraq mağazaya getməsini müəyyən ediblər. Bununla da şəhər sakini R.Məmmədov digər şəhər sakinlərinin sağlamlığını ciddi təhlükəyə atıb.

ŞBPİ-nin Kəpəz Rayon Polis şöbəsinin əməkdaşlarının həyata keçirdikləri tədbirlər nəticəsində daha bir şəhər sakini Mehman Nəcəfovun yaşadığı ünvanı tərk etməsi, dostları ilə yaxın təmasda olması və beləliklə COVID-19 virusunun yayılmasına şərait yaratması aşkar edilib.

Ev şəraitində koronavirusdan müalicə alan şəhər sakini, 1995-ci il təvəllüdlü İbrahimov Pirhüseyn Elb­rus oğlu da qaydaları pozan şəxslər sırasındadır. Hacıqabul Rayon Polis Şöbəsinin əməkdaşları tərəfindən keçirilmiş müvafiq tədbirlər nəticəsində onun da qanunsuz olaraq evi tərk etməsinə görə, barəsində Hacıqabul RPŞ-də Cinayət Məcəlləsinin 139-1.1-ci maddəsi ilə cinayət işi başlanılıb.

Bunlar son günlər koronavirusa qarşı mübarizə çərçivəsində qaydaları pozaraq insanların həyatını təhlükə altına atan məsuliyyətsiz vətəndaşların sadəcə bir qismidir.

Bu cür hallarla bağlı istər hüquq-mühafizə orqanlarının nümayəndələri, istərsə də həkimlər çıxışlarında əhalini qaydalara əməl etməyə çağı­rır, qoruyucu maska taxmağı, sosial məsafəni gözləməyi dönə-dönə xatır­ladırlar. Xəstəliyə yoluxmuş şəxslərin məsuliyyətsiz davranışları isə daha çox insanın həyatını təhlükə altına qoyur. Odur ki, yoluxmuş şəxslərin bilərəkdən küçəyə çıxması, yaşa­yış yerini tərk etməsi faktları onların həm də cinayət məsuliyyəti daşıma­sı məsələsini gündəmə gətirir. Bəli, müəyyən edilmiş qaydalar pozulur­sa, sözsüz ki, vətəndaş buna görə qanunvericiliyə görə, məsuliyyət daşıyır. Odur ki, mütəxəssislər yoluxma sayının artması ilə bağlı vəziyyətin daha da çətinləşəcəyindən narahatdırlar.

Həkim-infeksionist Nicat Əzimli bildirir ki, artıq uzun müddətdir ehtiyat etdiyimiz o çətin vəziyyət yaranmaq üzrədir, xəstəxanalarda koronavirus xəstələrinə görə boş yer yoxdur. Onun sözlərinə görə, bu gün insanların bir çoxu müalicəni evdə almalı olur.

Həkim bildirir ki, insanlar koronavi­rus pandemiyasını ciddiyə almalıdırlar və ondan qorunmağın ən effektiv yolu isə qaydalara əməl etməkdir: “Mövsümi xəstəliklərdə olduğu kimi, koronavirus­da da yoluxmanın sürətlə artımı özünü göstərir. Digər respirator infeksiyalardan fərqli olaraq, koronavirusun yoluxduru­culuq qabiliyyəti çox yüksəkdir. Hamı bir nəfər kimi maskadan istifadə etməli, sosial məsafəni gözləməlidir.”

Ə.ƏLƏSGƏRLİ, “Xalq qəzeti”