Fransanın ədalətli və obyektiv vasitəçi olması mümkün deyil

Noyabrın  25-də  Fransa Senatının  qondarma “Dağlıq Qarabağ respublikası”nın tanınmasının zəruriliyinə dair”   qətnamə layihəsini qəbul etməsi  bu ölkənin ATƏT-in Minsk qrupunun həmsədri kimi fəaliyyətsizliyinin göstəricisidir.  Senatın bu qərarından sonra Fransanın  ədalətli və obyektiv vasitəçi olmasının üstündən xətt çəkildi. Axı,  Fransa  Dağlıq Qarabağ  münaqişənin tənzimlənməsi prosesində sıravi üzv deyil, ATƏT-in Minsk qrupunun həmsədr dövlətidir. Beynəlxalq hüquqa görə, həmsədr dövlət neytral, tərəfsiz, qərəzsiz və obyektiv olmalıdır.

Fransa  Senatı səs çoxluğu  ilə hökumətdən qondarma “Dağlıq Qarabağ respublikası”nı  tanımağa  çağıran qərar qəbul edərkən, senatorlar  düşünmədilər ki, Fransa ATƏT-in Minsk qrupunun həmsədri  kimi Dağlıq Qarabağ münaqişəsinin nizamlanmasında vasitəçilik missiyasını üzərinə götürüb. Beynəlxalq ictimaiyyətə də bəllidir ki,  30 ildən də artıqdır  bu istqamətdə heç bir müsbət addım atılmayıb. Hətta, Fransa Senatı ATƏT-in Minsk qrupu həmsədr dövlətlərindən birinin  -- Rusiya Federasiyası Prezidenti Vladimir Putinin yaxın günlərdə  Ermənistanın  qondarma “Dağlıq Qarabağ”ın müstəqilliyini və suverenliyini tanımadığını xatırlatmasını da  nəzərə almadı. V. Putin açıq şəkildə bəyan etdi ki, beynəlxalq hüquqa əsasən, Dağlıq Qarabağ və ətraf rayonlar Azərbaycan Respublikasının ayrılmaz tərkib hissəsidir.  Bütün bunlara baxmayaraq, Fransa Senatı həm ölkəsinin maraqlarına , həm də beynəlxalq hüquq normalarına zidd olan qətnamə qəbul etdi.

Bu qətnamə beynəlxalq hüquq norma və prinsipləri, BMT Nizamnaməsi və BMT Təhlükəsizlik Şurasının müvafiq qətnamələrinin kobudcasına pozulması ilə yanaşı, Fransanın istər Minsk qrupunun həmsədr ölkəsi, istərsə də BMT Təhlükəsizlik Şurasının daimi üzvü kimi məramı və obyektiv fəaliyyəti ilə ziddiyyət təşkil edir. Fransa Senatının qəbul etdiyi qətnamədə ölkəmizin Türkiyə ilə sıx dostluq və qardaşlıq münasibətlərinin də düşmənlərə ciddi təsir etdiyi özünü  açıq şəkildə büruzə verir.  Sənədinin mətnindən də aydın olur ki, senatorları Dağlıq Qarabağın erməni əhalisinin taleyindən daha çox, Türkiyənin və Azərbaycanın getdikcə güclənməsi, sarsılmaz birliyi  narahat edir. Dağlıq Qarabağ münaqişəsinin tərəfləri Ermənistan və Azərbaycan olsa da, Türkiyənin adı qətnamədə daha çox çəkilir.

Yalan, böhtan və iftira üzərində qurulmuş qətnamədə  qeyd edilir ki, erməni mədəni irsi Fransanın da həmsədri olduğu ATƏT-in Minsk qrupu tərəfindən qorunmalıdır. Bu da növbəti uydurma. Çünki  erməni mədəni irsinin heç bir nümunəsi məhv edilməyib. Bunu təsdiqləyən  fakt yoxdur. Ancaq Azərbaycanın mədəni irsi ermənilər tərəfindən yerlə -yeksan edilib. Prezident İlham Əliyev Fransa Prezidenti Makronla danışanda  da bu məsələni xüsusilə diqqətə çatdırdı. Qətnamədə Gəncə əvəzinə Kirovabad yazılması  bir daha Azərbaycana qarşı onların necə qərəzli, ümumulikdə,  münaqişənin tarixindən, baş verən hadisələrdən bixəbər olduqlarını  təsdiqləyir.

Məlahət İBRAHİMQIZI,
Milli Məclisin deputatı, YAP Nəsimi rayon təşkilatının sədri