Tarixin gedişatını dəyişən lider

44 günlük Vətən müharibəsi dövlətimizin tarixində, eyni zamanda, hər bir azərbaycanlının yaddaşında əbədi qa­lacaq, heç vaxt unudulmayacaq ən parlaq səhifə kimi öz əksini tapdı. Prezident, Ali Baş Komandan cənab İlham Əliyev şəxsi keyfiyyətləri, əzmi, qətiyyəti ilə tarixi gedişatı dəyişməyi ba­cardı. Azərbaycan xalqının milli mənliyini, gücünü özünə qaytardı, Qarabağın işğaldan azad olunmasına böyük məharətlə rəhbərlik etdi. Tarixi ədaləti bərpa edən Ali Baş Komandan İlham Əliyev qu­rucu lider, müzəffər sərkərdə və xalqımızın ən böyük arzularını gerçəkləşdirən şəxsiyyət kimi öz adını əbədi olaraq tarixə həkk etdi. Qısa müddətli hərbi əməliyyatlar nəticəsində möhtəşəm Qələbə təmin olundu, bütün dünya sürətlə inkişaf edən Azərbaycanın, onun Prezidentinin və ordusunun gücünü gördü. Təkbaşına öz ərazi bütövlüyünü təmin etməyi bacaran Azərbaycan bu gün öz tarixi torpaqlarına--doğma Qarabağımıza qayıdır və artıq həmin ərazilərdə şanlı Azərbaycan bayrağı dalğalanır.

Azərbaycan Ordusunun uğurları­nın kökündə Prezident İlham Əliyevin son 17 ildə davam etdirdiyi, yeni çalarlarla zənginləşdirdiyi, çağdaş dövrümüzün tələblərinə uyğun çevik formada gerçəkləşdirdiyi ulu öndər Heydər Əliyevin siyasəti dayanır. Ümummilli lider Heydər Əliyev vurğulayırdı: “Mənim axıra çatdıra bilmədiyim taleyüklü məsələləri, planları, işləri sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümid bəsləyirəm”. Azərbaycan xalqı bu tarixi bəyanatın gerçəkliyinə bir daha əyani şahid oldu. Prezident İlham Əliyev ümummilli lider Heydər Əliyevin bütün gözləntilərini 17 illik hakimiyyəti dövründə gerçəkləşdirməyi bacardı.

Prezident İlham Əliyevin apar­dığı məqsədyönlü və uğurlu siyasət nəticəsində peşəkar ordu quruculuğu, yüksək diplomatiya, qabaqcıl infor­masiya təminatı və iqtisadi sahədə saysız-hesabsız nailiyyətlər qaza­nıldı. Cəmi 44 günə təmin olunan Qələbənin qazanılması üçün illərdir düşünülmüş planlı siyasət həyata keçirildi. Ötən illərdə Azərbaycan çeşidli təzyiqlərlə, siyasi çəkişmələrlə üzləşdi. Dövlət başçımız İlham Əliyev bütün bunlara rəğmən bir addım olsun belə geri durmadı, müstəqil siyasət apararaq dövləti, xalqı daha da güclü şəkildə irəliyə apardı, ca­nından artıq sevdiyi ölkəsini davamlı olaraq inkişaf etdirdi.

Ötən 17 ildə Azərbaycanın ən ağrılı problemi olan Dağlıq Qa­rabağ münaqişəsi bir an olsun belə diqqətdən kənarda qalmadı. Ölkəmizin bu istiqamətdə mövqeləri gücləndi, ərazi bütövlüyümüz nüfuzlu qurumların rəsmi qərarlarında bir daha əks olundu. Bu qərarlar haqq işimizin uğurla yekunlaşmasında mü­hüm amil oldu. Azərbaycan Prezidenti həmin sənədlərin verdiyi üstünlüklərə, beynəlxalq hüquqa söykənərək, ölkəmizə olan təzyiqləri böyük ustalıqla dəf etdi. Məhz bu fəaliyyət sayəsində müharibənin gedişatında ölkəmizi dəstəkləyən dövlətlərin sayı artdı.

Beləliklə, ötən dövrdə səbir və təmkinlə yürüdülən siyasət nəticəsində qüdrətlənmiş Azərbaycan haqqı, ədaləti, beynəlxalq hüququ bərpa etməyə nail oldu. Bütün dünya haqqa söykənən Azərbaycanın artan gücü ilə də hesablaşmalı oldu.

Çox böyük peşəkarlıq, məharət, şücaət və fədakarlıq tələb edən döyüşlərdə müzəffər Azərbaycan Ordusu tarixi missiyanın öhdəsindən şərəflə gəldi. Füzuli, Cəbrayıl, Qubad­lı, Zəngilan rayonları, ümumilikdə 300-ə yaxın kənd, 5 şəhər, 4 qəsəbə və çoxsaylı strateji yüksəklik xilas edildi. Ali Baş Komandanın rəhbərliyi ilə həyata keçirilən Şuşa şəhərinin işğaldan azad olunması əməliyyatı dünya hərb tarixinin ən parlaq səhifələrindən birinə çevril­di. Müharibədə ağır itkilər verən, məğlubiyyətin qaçılmazlığını anlayan Ermənistan müqaviməti dayandır­mağa, Azərbaycanın şərtlərini qəbul etməyə məcbur oldu, digər ərazilərin boşaldılacağı ilə bağlı öhdəlik götürdü və hazırda həmin ərazilərin qansız-qadasız boşaldılmasının şahidiyik. Azərbaycan, Rusiya prezidentlərinin və Ermənistanın baş nazirinin birgə imzaladıqları bəyanat düşmən ölkənin kapitulyasiyasının ifadəsi idi.

Prezident İlham Əliyev 44 gün ərzində təkcə Ali Baş Komandan kimi cəbhədə gedən əməliyyatlara rəhbərlik etmədi, bütün bu uğurlu əməliyyatlar Azərbaycana qarşı artan siyasi-diplomatik təzyiqlər şəraitində həyata keçirildi. Dövlət başçımız bu si­yasi təzyiqlərə peşəkarlıqla, məharətli və vaxtında atılan diplomatik addım­larla duruş gətirdi və bu onları neyt­rallaşdırdı. Cənab İlham Əliyev xarici televiziyalara verdiyi müsahibələrdə Azərbaycanın milli maraqlarının qətiyyətlə müdafiəsindən geri dur­madı, dünyada mövcud olan ikili standartları, riyakarlığı elə bu siyasəti icra edən ölkələrin televiziyalarına müsahibələrində ifşa etdi.

Bu zaman ərzində Gəncəyə, Bərdəyə, Tərtərə atılan ballistik və kasetli raketlər də birliyimizi pozma­ğa, həmçinin millətin ruhunu qırmağa hesablanmışdı. Amma baş verən bu müharibə cinayətləri Azərbaycan xalqının əzmini, iradəsini əzə bilmədi, onu qorxutmadı, əksinə gücləndirdi. Göstərilən təzyiqlərə baxmaya­raq, birliyimiz, Ali Baş Komandan ətrafında bir yumruğa çevrilməyimiz bizim bu bəlalardan çıxmağımız­da mühüm rol oynadı. Ölkədə milli həmrəyliyi, xalq-iqtidar birliyini daha da gücləndirən cənab İlham Əliyev Azərbaycan xalqının onun ətrafında sıx birləşməsinə, sonsuz etimadına, inam və dəstəyinə güvənib şərəfli və çətin vəzifəni həyata keçirdi. Bu dövrdə Azərbaycan əsl milli həmrəylik, birlik nümayiş etdirdi. Dünyanın hansı guşəsində yaşama­sından, eləcə də siyasi mövqeyindən asılı olmayaraq, hamı bir yumruq kimi Prezident İlham Əliyevin ətrafında birləşdi. Haqq işimizi yarıda qoyma­maq üçün xarici qüvvələrin təzyiqinə cəsarətlə sinə gərən, onları dəf edən cənab İlham Əliyev əsl fədakarlıq nümunəsi nümayiş etdirməklə uzaqgörənlik, vətənpərvərlik, qətiyyət, əzm, prinsipiallıq, dönməzlik rəmzinə çevrildi. Nəticədə qazanılan Qələbə Azərbaycanın həm hərbi, həm diplomatik, həm də siyasi müstəvidə zəfərinin təntənəsidir.

Azərbaycan müharibədən uğurla və böyük zəfərlə çıxdı, vətəndaşlarımızın 30 ilə yaxın davam edən torpaq həsrətinə son qoyuldu, əldə olunan qələbə xalqın inamını özünə qaytardı. Torpaqlarımızın işğaldan azad edilməsi uğrunda canını, qanını fəda etmiş qəhrəman oğullarımızın, həmçinin həlak olan mülki vətəndaşlarımızın qisası alındı. Azərbaycan dövlətinin hərtərəfli qay­ğısı ilə əhatə olunmuş şəhidlərimizin xatirəsi qəlbimizdə əbədi yaşayacaq və gələcək nəsillər onları hər zaman fəxr və qürur hissi ilə yad edəcəklər.

Azərbaycanın şanlı bayrağı işğal­dan azad edilmiş torpaqlarda dalğala­nır. Prezidentimizin vurğuladığı kimi, bundan sonra Azərbaycan xalqı qürur hissi ilə müzəffər xalq kimi yaşaya­caq: “Biz bütün dünyaya göstərmişik ki, yenilməz xalq Azərbaycan xalqıdır, müzəffər ordu Azərbaycan Ordusu­dur. Erməni mifini məhv etdik, erməni uydurmalarını məhv etdik, onları yerinə oturtduq, onlar bizim qabağı­mızda diz çöküblər və onlar bundan sonra bu damğa ilə yaşayacaqlar, rəzalət damğası ilə yaşayacaqlar. Biz isə bundan sonra qürur hissi ilə yaşa­yacağıq -- müzəffər xalq kimi, güclü dövlət kimi, yenilməz ordu kimi, güclü iradə sahibi kimi”.

Havar MƏMMƏDOV,
BMU-nun rektoru, professor