Köhnə versiya

Ən son xəbərlər

Son buraxılış
Arxiv

Daha böyük qələbələrə doğru irəliləyirik...

Azərbaycan ordusunun qələbə marşı davam edir. Artıq 4 şəhərimiz, 3 böyük qəsəbəmiz, sayı 100-ü çoxdan ötmüş onlarla kəndimiz düşmən tapdağından azad edilib. Təsəvvür edin, ordumuzun müzəffər irəliləyişi, Ali Baş Komandana, dövlət - xalq birliyinə inamın sarsılmazlığı cəmiyyətə elə ruh, elə vüsət bəxş edib ki, artıq hər gün deyil, hər saat içində belə cəbhədən ən xoş xəbərlər gözləyirik. Nə gizlədək, cəmi bir neçə ay öncə, bir işğalçı hərbçinin zərərsizləşdirilməsi, bir düşmən hərbi texnikasının sıradan çıxarılması, bir erməni postunun dağıdılması, az qala elliklə uğur kimi qəbul edilir, geniş tirajlanırdısa, indi böyük uğurlara, dövlət başçısının müjədlərinə vərdiş etmişik; məhv edilmiş, hərbi qənimət kimi götürülmüş texnikanın sayı-hesabı hər saat artan xətt üzrə dəyişir. Əlbəttə, bu, adiləşmə deyil, inamın ən müsbət emosiya ilə sabitləşməsi, uğurların dayanıqlı şəkil alması ilə bağlıdır. Fikir vermisinizsə, neçə-neçə kəndin azad edilməzi haqqında “Tvit”ləri oxuyan, yayan, sevinən ictimai fəal qüvvələr, sadə vətəndaşlar cənab Prezidentdən məhz Xalqa Müraciət gözlədiyini də gizlətmir. Təkrar edirəm, bu, məhz sarsılmaz inamın ifadəsidir, öz Ali Baş Komandanına böyük sevginin təcallasıdır. Bu fikirləri Milli Məclisin Mədəniyyət komitəsinin sədri Qənirə Paşayeva Azərbaycan Orduaunun cəbhədə qazandığı uğurlarla bağlı danışarkən dedi.

“Cənab İlham Əliyevin hələlik ən axırıncı – el sözü ilə desək, axarıncı müraciəti Zəngilan şəhərinin azad edilməsi ilə bağlı olub.” -- deyən deputat bildirdi ki, ola bilsin, bu yazı yayınlanınca, artıq yeni şəhərimizin müjdəsi xəvər veriləcək. “Ola bilsin” yazmağımı belə özümə irad tutmaq istərdim – qrammatik və üslubiyyət xətası sayılmasaydı, “olacaq” yazardım. Əlbəttə, olacaq! Cənab Prezidentin öz sözüdür, “Şuşasız, işimiz yarımçıq qalar”! – Cəbrayıl, Hadrut, Füzuli, Zəngilan, Qubadlı... – heç zərrə qədər də şübhə yoxdur ki, uyğun ardıcıllıqla digər şəhər və qəsəbələrimiz “bəlkə sabah, bəlkə sabahdan daha erkən” azad olunacaq, bu gözəl sıralamada öz yerini alacaq!

“Qarabağ Azərbaycandır” -- deyən Q. Paşayeva sözünə davam etdi:

- Bəli, cənab Prezidentin xalqa müraciətlərinin hər biri özlüyündə bir əsərdir, bir dərs proqramıdır – böyük ismarıclar toplusudur. Gəlin fikrimizi sonuncu xalqa müraciət əsasında tezislər şəkilndə möhkəmlədək: Azərbaycan Silahlı Qüvvələri Ermənistana layiq olduğu yeri göstərir. Ordumuz qarşısında sözün bütün mənalarında diz çökən Ermənistan silahlı qüvvələri məğlubiyyətlə de-fakto barışıb, de-yure barışması üçün sayılı günlər qalıb. Ermənistanın qarşısında bir yol, o yola münasibətdə iki seçimi var: ordusu tam sıradan çıxarıldıqdan sonramı məğlubiyyəti etiraf edəcək, yoxsa, hələ tam sıradan çıxarılmamış hərbi bölmələrini geri çəkib, qoruyaraqmı məğlub olduğunu bildirəcək..? – Budur məsələ. Görünən odur ki, işğalçı ölkə aqoniya vəziyyətində, rabitəsiz, parakəndə formada sona qədər müqavimət cəhdini seçib. Döyüş meydanında Azərbaycanın üstünlüyü artıq heç kimə sirr deyil. Haqq yolunda vuruşan xilaskar ordumuz bütün cəbhə boyu tam üstünlüyə malikdir. Ermənistan ordusu faşist ordusudur. Faşizm bəşəri problem olsa da, Azərbaycan əsgəri onunla təkbaşına vuruşur. Düşmənin “qalib ordu”, “yenilməz hərbçilər” kimi hərbi-ideoloji miflərinin dəyər daşımadığı faş olub. Düşmən ordusuna layiq “epitet”lər çoxdur, o sırada “namərd”, “xain” epitetləri xüsusi yerə sahibdir. Düşmən ordusu, öz siyasi-hərbi rəhbərliyinin tapşırıqları əsasında dinc insanları, mülki infrastrukturu raket atəşinə tutur. Biz bir tərəfdən, mənfur, vəhşi düşməndən azad edilmiş yaşayış məntəqələrimizin barbarcasına viran edilmiş halını görürük, digər yandan, Tərtər, Ağcabədi, Gəncə və b. yerlərdə yaşayış məntəqələrimiz bugünlərdə ağır atəşlərə məruz qalır. Yəni, “guya demokrat” Paşinyan öz əliqanlı diktator sələflərinə çox layiqli davamçı olduğunu sübut etməkdədir. Ermənistanın qanunusz əməlləri zaman-zaman yer adlarının dəyişdirilməsində, eybəcərləşdirilməsində də özünü göstərib. Ordumuzun sentyabrın 27-dən başlayan müzəffər irəliləyişi ilə təkcə torpaqlarımız azad olunmur, toponimlərimiz də işğaldan qurtulur. Rəsmi İrəvanın tarixi saxtalaşdırma siyasətinə Qarabağ ərazisində son qoyulur. Artıq Madagiz – Suqovuşan, Vəng – Çinarlıdır. Azərbaycan dövlətinin siyasi iradəsi ilə Ermənistandakı toponimlərimiz  gələcəkdə öz ilkin,doğma adlarına qovuşacaq.

Qarabağ torpaqlarına həyat qayıdacaq. Üzlərdə təbəssüm, dodaqlarda gülüş çiçəkləyəcək. Həsrət bitir. Xalq doğma torpaqlarında əmin-amanlıqyaradacaq. Xalq öz dövlətinə, öz Ali Baş Komandanına inanır, ona etimad göstərir. Bu ümumxalq sevgisi, milli etimad dövlət siyasətinin gücünü artırır və daha səmərəli edir. Xalq tərəfindən göstərilən etimad böyük qələbəmizin rəhnidir. Ümumxalq dəstəyi, milli həmrəylik – dövlət-xalq birliyi qarşıda duran məqsədlərə qısa müddət içində nail olmağa geniş imkanlar yaradır. Bir tərəfdən, yüksək dövlət-xalq birliyi və haqlı mövqeyimiz Azərbaycanı beynəlxalq arenada güclü, sözümüzü ötkün edir. Qarabağda müzəffər irəliləyişimiz bizi böyük sabahlara səsləyir! Bizə bu qüruru yaşadan ordumuz, Ali Baş Komandanımız var olsun! İşimiz haqq işidir, biz qalib gəlirik!

Zərifə BƏŞİRQIZI,
“Xalq qəzeti”

26 Oktyabr 2020 10:37 - CƏMİYYƏT
CƏMİYYƏT
29 Noyabr 2020 | 00:35
Ömür vəfa etsəydi...
27 Noyabr 2020 | 23:31
Şəmkirdə nəcib aksiya

Köhnə versiyamızdan xəbərləri izlə