Köhnə versiya

Ən son xəbərlər

Son buraxılış
Arxiv

Gəncə xanı Cavad xanın nəslinin Malayziyada yaşayan davamçısı Kazım Cavadxanlı Ermənistana sərt çağırış edib

Gəncə xanı Cavad xanın nəslinin hazırda Malayziyada yaşayan davamçısı, tanınmış beyin cərrahı Kazım Cavadxanlı Ermənistanın Azərbaycana qarşı davam etdirdiyi hərbi təcavüzkarlığı, o cümlədən Gəncə şəhərinə raket hücumlarını kəskin şəkildə pisləyib.

AZƏRTAC-ın xüsusi müxbiri xəbər verir ki, Azərbaycanın Malayziyadakı səfirliyi ilə telefon əlaqəsi saxlayan soydaşımız müxtəlif yerli və beynəlxalq KİV-lərdə Ermənistanın Gəncədə törətdiyi qanlı hadisələr barədə gördüyü süjetlərdən dəhşətə gəldiyini, Ermənistanın siyasi-hərbi rəhbərliyinin əməllərinin birmənalı olaraq müharibə cinayəti olduğunu bildirib. K.Cavadxanlı deyib: “Görünür, Ermənistan rəhbərliyi beynəlxalq hüquqla yanaşı, tarixi həqiqətlərə də məhəl qoymur. Azərbaycan xalqının, rəşadətli Azərbaycan igidlərinin tarixdəki bənzərsiz şücaətlərini nə tez belə unudublar? Şanlı keçmişimizdən bilirik ki, Azərbaycan xalqının dostluğu nə qədər möhkəm, qonaqpərvərliyi nə qədər mehribandırsa, qəzəbi də o qədər şiddətlidir. Bir neçə gün bundan əvvəl Gəncədə olduğu kimi, günahsız körpələri, qocaları, qadınları gecə yarısı amansızcasına qətlə yetirmək dünyanın hər bir ölkəsində lənətlə qarşılanır. Ermənistan rəhbərliyi gec-tez bütün bunların cavabını verəcək.

Bu ağır günlərdə Azərbaycanın Ali Baş Komandanı, Prezident İlham Əliyevin uzaqgörən və məğrur siyasəti nəticəsində Azərbaycan əsgərinin cəbhədə ard-arda uğurlar qazanması yaralarımıza məlhəm kimi gəlir. Sevinirik, qürur duyuruq. Mən bütün soydaşlarmıza ən qısa zamanda mütləq qəlbə arzulayıram. Əminəm ki, o qələbə uzaqda deyil”.

K.Cavadxanlı, həmçinin Ermənistanın hərbi təxribatları zamanı həlak olan soydaşlarımızın yaxınlarına başsağlığının, eləcə də yaralılara şəfa diləyinin çatdırılmasını xahiş edib.

Ölkəmizin Malayziyadakı səfiri Qaley Allahverdiyev K.Cavadxanlıya təşəkkür edib, bu gün yaşadığı yerdən asılı olmayaraq dünyadakı soydaşlarımızın bir amal, bir qayə uğrunda birləşərək Vətən müharibəsində Azərbaycana verdiyi hər bir dəstəyin önəmli olduğunu bildirib.

20 Oktyabr 2020 11:04 - SİYASƏT
SİYASƏT

Köhnə versiyamızdan xəbərləri izlə