Köhnə versiya

Ən son xəbərlər

Son buraxılış
Arxiv

Dövlət İmtahan Mərkəzində SAT imtahanı keçiriləcək

SAT imtahanı sentyabrın 26-da Dövlət İmtahan Mərkəzinin (DİM) Mikayıl Müşfiq küçəsi, 1M ünvanında yerləşən inzibati binasında təşkil olunacaq.

DİM-dən AZƏRTAC-a bildirilib ki, imtahanda iştirak edəcək şəxslər saat 07:30-dan gec olmayaraq aşağıda qeyd edilən sənədlərlə birlikdə imtahan binasında olmalıdırlar:

1. Şəkilli şəxsiyyət vəsiqəsi və ya xarici pasport;

2. Buraxılış vərəqəsi – Admission Ticket;

3. İmtahan iştirakçısının sağlamlığı haqqında bəyannamə.

Sağlamlıq haqqında bəyannamə imtahan iştirakçısı tərəfindən çap edilir və imzalanır.

Qeyd edilən sənədlərdən biri olmadıqda və ya sənədlər arasında uyğunsuzluq olduqda iştirakçı test mərkəzinə buraxılmır.

On beş və daha aşağı yaş qrupuna aid olan uşaqlar imtahan binasına valideynləri ilə birlikdə gəlməlidirlər.

Ehtiyat tədbirləri çərçivəsində imtahan binasına daxil olan iştirakçıların məsafədən ölçə bilən elektron termometrlə bədən hərarətləri yoxlanılacaq, zəruri dezinfeksiyaedici vasitələrdən istifadə olunacaq və imtahan otağında iştirakçıların bir-birindən lazımi uzaq məsafədə əyləşdirilməsi, həmçinin fasilə zamanı ara məsafənin saxlanılması təmin olunacaq.

İştirakçılar imtahana tibbi maska ilə gəlməli və onlardan düzgün (burun, ağız və çənə nahiyəsini tam örtməklə) istifadə etməlidirlər. Maskanı çıxarmaq qadağandır və bütün prosesboyu (buraxılış rejimi, imtahan müddəti, imtahan binasının tərk edilməsi) istifadə olunmalıdır.

Qeyd edək ki, DİM pandemiya şəraitində SAT imtahanlarının ölkə ərazisində keçirilməsinə icazəsi olan yeganə SAT Test Mərkəzidir.

SAT imtahanları haqqında daha ətraflı məlumatı DİM-in rəsmi internet saytından əldə etmək olar.

24 Sentyabr 2020 13:13 - TƏHSİL
TƏHSİL

Köhnə versiyamızdan xəbərləri izlə