Köhnə versiya

Ən son xəbərlər

Son buraxılış
Arxiv

Yanvar-aprel aylarında neft və qaz hasilatı artıb

2020-ci ilin yanvar-aprel aylarında Azərbaycanda 12,4 mln.ton neft (kondensatla birlikdə) hasil edilib. Neft (kondensatla birlikdə) hasilatı ötən ilin müvafiq dövrü ilə müqayisədə, təxminən, 11 min ton çox olub.

Energetika Nazirliyindən verilən məlumatda bildirilir ki, respublika üzrə hasil edilmiş neftin (kondensatla birlikdə) 8,6 mln. tonu “Azəri-Çıraq-Günəşli”nin, 1,3 mln. tonu (kondensat) “Şahdəniz”in payına düşüb. SOCAR üzrə hasilat isə 2,5 mln. ton təşkil edib.

Cari ilin 4 ayında 10,2 mln. ton neft (kondensatla birlikdə) ixraca nəql olunub. Bu 2019-cu ilin yanvar-aprel aylarına nisbətən 106 min ton azdır. Neft-kondensatın 9,8 mln. tonu konsorsium, 409 min tonu isə SOCAR üzrə ixraca nəql edilib. 

2020-ci ilin 4 ayı ərzində ötən ilin müvafiq dövrünə nisbətən 15 faiz, yəni 1,8 mlrd. kubmetr artımla 13,4 mlrd. kubmetr qaz hasil edilib. Qaz hasilatının 4,6 mlrd. kubmetri   AÇG-dən, 6,4 mlrd. kubmetri isə “Şahdəniz”dən əldə edilib. SOCAR üzrə bu dövrdə 2,4 mlrd. kubmetr qaz hasil olunub. 

Bu dövrdə xaricə qaz satışı 4,6 mlrd. m3 təşkil edib ki, bu da ötən ilin müvafiq dövrü ilə müqayisədə 13,5 faiz çoxdur. Cari ilin yanvar-aprel aylarında 2019-cu ilin müvafiq dövrünə nisbətən Türkiyəyə 23,6 faiz çox, yəni 3,5 mlrd. m3 qaz ixrac edilib. Gürcüstana ixrac edilən qazın həcmi isə 1,1 mlrd. m3 olub. Qeyd edək ki, TANAP ilə Türkiyəyə bu müddətdə 1,3 mlrd.m3 qaz nəql olunub. İstismara veriləndən mayın 1-dək TANAP-la Türkiyəyə 5,1 mlrd. m3-dən çox qaz nəql edilib.

İstismara veriləndən mayın 1-dək olan dövrdə isə “Azəri-Çıraq-Günəşli” və “Şahdəniz” yataqlarından 535 mln. ton neft (kondensatla birlikdə), 293 mlrd. m3 qaz hasil edilib. Bu yataqlardan 538,7 mln. ton neft (kondensatla birlikdə), 81,6 mlrd. m3 qaz isə ixraca nəql olunub.

2020-ci ilin 4 ayında 2,013 min ton neft emal edilib. Neft emalı ötən ilin müvafiq dövrünə nisbətən 32,6 min ton çox olub. 

Samirə Əliyeva,
“Xalq qəzeti”

22 2020 16:23 - İQTİSADİYYAT
İQTİSADİYYAT

Köhnə versiyamızdan xəbərləri izlə