Türkiyənin S-400 sistemlərinin sınaqlarına başlaması ABŞ-ı ciddi narahat edib

Türkiyə hökuməti tərəfindən Rusiyadan əldə edilən “S-400” zenit-raket sistemlərinin radiolokasiya stansiyalarının sınaqdan keçirilməsi zamanı Amerikanın “F-16” qırıcı bombardmançılarından istifadə edilməsi Vaşinqtonda ciddi narahatlıqlara səbəb olub.

“TASS” agentliyinin məlumatına görə bu barədə ABŞ dövlət katibi Mayk Pompeo bununla bağlı jurnalistlərin ünvanladığı sualı cavablandırarkən bildirib.

“Türkiyə və “S-400” haqqında ilk sualınıza gəlincə... Bəli, bu narahatlıq doğurur”, - Pompeo belə deyib.

Eyni zamanda, dövlət katibi ABŞ və Türkiyənin Ankaranın Moskvadan “S-400” zenit-raket sistemləri almasından sonra yaranmış vəziyyətdən çıxış yolu əldə edilməsi üçün dialoqların davam etdiyini də bildirib. O, Türkiyənin yeni addımının Vaşinqtonun Ankaraya qarşı sanksiyalar tətbiq etməsi baxımından hər hansı bir xüsusi əhəmiyyət kəsb edib-etməməsi sualına cavab verməkdən imtina edib.

“Xalq qəzeti”