Köhnə versiya

Ən son xəbərlər

Son buraxılış
Arxiv

Energetika Nazirliyində Banqladeşin Energetika və Mineral Ehtiyatlar üzrə dövlət naziri ilə görüş olub

Energetika Nazirliyində Banqladeşin Energetika və Mineral Ehtiyatlar üzrə dövlət naziri ilə görüş olub

Energetika naziri Pərviz Şahbazov ilə Beynəlxalq Enerji Xartiyası Forumu çərçivəsində Bakıda səfərdə olan Banqladeşin Energetika və Mineral Ehtiyatlar üzrə dövlət naziri Nasrul Hamid arasında görüş keçirilib.

Nazirlikdən aldığımız məlumatda bildirilir ki, görüşdə ikitərəfli əlaqələrin mövcud vəziyyəti və inkişaf perspektivləri, xüsusilə də enerji sahəsində əməkdaşlığın genişləndirilməsi imkanları müzakirə edilib. Enerji Xartiyası çərçivəsində əməkdaşlığın iki ölkə arasında münasibətlərin inkişafı üçün imkanlar yaratdığını qeyd edən nazir gələn il Beynəlxalq Enerji Xartiyası Konfransına Azərbaycanın sədrlik edəcəyini bildirib. Görüşdə enerji sahəsində əməkdaşlıqda SOCAR-ın mühüm rol oynadığı qeyd edilib. Banqladeşin neft-qaz yataqlarının işlənməsində SOCAR-ın təcrübəsindən istifadənin, həmçinin “SOCAR Trading S.A.” tərəfindən Banqladeş istiqamətində neft məhsullarının təchizatının davam etdirilməsinin əhəmiyyətindən bəhs edilib.

Energetika naziri Pərviz Şahbazov Azərbaycanın neft-qaz layihələri, elektrik enerjisi sektorunda inkişaf göstəriciləri ilə bağlı məlumatları, bərpa olunan enerji sahəsində potensial və hədəfləri diqqətə çatdırıb.

 Banqladeşli nazir də öz növbəsində, ölkəsinin energetika sektorunda baş verən sürətli inkişaf prosesindən, qaz yataqlarının işlənilməsi, generasiya gücünün xüsusilə bərpa olunan enerji hesabına artırılması hədəflərindən danışıb.  Azərbaycanın bərpa olunan enerji üzrə əməkdaşlıq etdiyi Səudiyyə Ərəbistanının “ACWA power” şirkəti ilə  Banqladeşin də hazırda LNG infrastrukturunun yaradılması və günəş enerjisi  layihələri üzrə əməkdaşlıq etdiyi bildirilib.

 

Samirə Əliyeva,
“Xalq qəzeti”

23 Oktyabr 2019 16:16 - XƏBƏRLƏR
XƏBƏRLƏR

Köhnə versiyamızdan xəbərləri izlə