Köhnə versiya

Ən son xəbərlər

Son buraxılış
Arxiv

Nəsiminin 650 illiyi şərəfinə layihə Berlində maraqla qarşılanıb

Nəsiminin 650 illiyi şərəfinə layihə Berlində maraqla qarşılanıb

Almaniyanın paytaxtı Berlində Azərbaycan Bəstəkarlar İttifaqının təşkilatçılığı ilə böyük şair və mütəfəkkir İmadəddin Nəsiminin 650 illiyi ilə bağlı bəstəkarlarımızın əsərlərindən ibarət “In Memoriam Nasimi – 650 Jahre Imadeddin Nasimi” adlı konsert təqdim olunub.Bu barədə  Mədəniyyət Nazirliyindən bildiriblər.

Sentyabrın 19-da Bəstəkarlar İttifaqında bu layihəyə həsr olunmuş mətbuat konfransı keçirildi. Tədbirdə Bəstəkarlar İttifaqının sədri, Xalq artisti Firəngiz Əlizadə, “İnci” qanun qrupunun rəhbəri, Əməkdar artist Təranə Əliyeva, Akademik Opera və Balet Teatrının solisti, Əməkdar artist Afaq Abbasova, Milli Konservatoriyanın professoru, Əməkdar artist İlham Nəcəfov və konsertdə çıxış etmiş ifaçılar iştirak etmişlər.

Tədbiri giriş sözü ilə açan Firəngiz Əlizadə bildirdi ki, Bəstəkarlar İttifaqı ilk dəfə özünün təşəbbüsü ilə Almaniyada üç gün konsert verdi. Birinci gün balet truppasının iştirakı ilə “Nəsimiyə ithaf” əsəri təqdim olundu: “Bu səhnə əsərinin təqdimatında xoreoqraf Nailə Məmmədzadənin böyük əməyi var. Anar Mikayılov da Nəsiminin obrazını çox gözəl canlandırdı”.

Firəngiz Əlizadə konsertin birinci günündə bəstəkar Aliyə Məmmədovanın “Mərhəba” əsərinin və Tahir İbişovun “İşıqdan qopmuşlar” simli kvartet və vokal ifaçısı üçün musiqili kompozisiyasının səsləndirildiyini də vurğuladı. Konsertin ikinci günündə daha çox musiqi parçaları təqdim olunub. Firəngiz Əlizadənin simli kvartet üçün “Muğamsayağı” əsəri və Səid Qəninin “İstəməz” pyesi, eləcə də Mütəllim Dəmirovun ifasında bəstəkar Firudin Allahverdinin “Hardadır yaradan” musiqili kompozisiyası səsləndirilib. F.Əlizadə üçüncü konsertin “Teatron” salonunda  keçirildiyini bildirdi: “Bunlar hamısı böyük uğurdur. Bildiyiniz kimi, “Nəsimi ili” çərçivəsində Azərbaycanda bir sıra  tədbirlər keçirilib. Almaniyada keçirilən konsert isə “Nəsimi ili”nə böyük töhfə oldu. İnanırıq ki, Almaniyada da Nəsimini sevdirə bildik”.

Əməkdar artist İlham Nəcəfov isə bütün musiqiçilərin konsertdə çox yüksək səviyyədə iştirak etdiklərini bildirdi: “Xalq musiqi alətlərimiz də alman dinləyicilərinə çox xoş təsir bağışladı”.Bəstəkar Aliyə Məmmədova konsertdə ifa edilən əsərlərin üçünün yeni olduğunu söylədi: “Onların məşqi də konsertdən bir neçə ay əvvəl olmuşdu. Musiqiçilərimiz böyük uğurla çıxış etmişlər”.

Qeyd edək ki, Berlində keçirilmiş konsertdə bəstəkarlar Firəngiz Əlizadə, Cəlal Abbasov, Aliyə Məmmədova, Səid Qəni, Tahir İbişov və Firudin Allahverdinin əsərləri ifa olunub. Konsertdə xanəndələr – Qədim musiqi alətləri ansamblının solisti, Xalq artisti Teyyub Aslanov, Opera və Balet Teatrının solisti Mütəllim Dəmirov, soprano Afaq Abbasova çıxış ediblər. Nəsimi obrazını Opera və Balet Teatrının balet truppasının aparıcı solisti Anar Mikayılov canlandırmışdır.

 

M.MÜKƏRRƏMOĞLU,
 “Xalq qəzeti”

24 2019 11:25 - MƏDƏNİYYƏT
MƏDƏNİYYƏT

Köhnə versiyamızdan xəbərləri izlə