Köhnə versiya

Ən son xəbərlər

Son buraxılış
Arxiv

Ərəb koalisiyası husilərin hərbi obyektlərinə qarşı əməliyyata başlayıb

Ərəb koalisiyası Yəmənin Xodeyda liman şəhərindəki hərbi obyektlərə qarşı əməliyyata başlayıb. Bu barədə “Əl-Ərəbiyyə”yə istinadən “İnterfaks” xəbər verib.
Koalisiyanın nümayəndəsi Türki əl-Maliki bəyan edib ki, həyata keçirilən hərbi əməliyyat beynəlxalq hüquq normalarına uyğundur. O, mülki əhalini əməliyyatın keçirildiyi ərazidən uzaqlaşmağa çağırıb.
Türki əl-Malikinin sözlərinə görə, koalisiya qüvvələri məsafədən idarə olunan katerlərin və dəniz minalarının yığıldığı dörd montaj meydanını məhv edib. Ər-Riyadın Ərəb koalisiyası husilərin hərbi obyektlərinə qarşı əməliyyata başlayıb, həmin obyektlərin məhvi dənizdə gəmilərin azad hərəkətinə kömək edəcək.
Türki əl-Maliki onu da bildirib ki, bir qədər əvvəl koalisiya qüvvələri husilər tərəfindən Qırmızı dənizin cənubunda terror aktı törədilməsi cəhdini pozublar.
Eyni zamanda, Yəməndəki husi qiyamçıları sentyabrın 14-də Səudiyyə Ərəbistanının “Saudi Aramco” şirkətinin obyektlərinə hücuma görə məsuliyyəti öz üzərlərinə götürüblər. Hücum nəticəsində Səudiyyə Ərəbistanında neft hasilatına çox ciddi ziyan dəymişdi. Ancaq rəsmi Ər-Riyad sentyabrın 18-də bəyan etmişdi ki, neft obyektlərinə raket hücumu Yəməndən həyata keçirilməyib. Bununla belə, husilər israr edirlər ki, bu, məhz onların əməlidir.
Xatırladaq ki, Yəməndə silahlı münaqişə 2014-cü ilin martından davam edir. Səudiyyə Ərəbistanı isə münaqişəyə 2015-ci ildən qoşulub. Onun və BƏƏ-nin başçılıq etdiyi koalisiya qiyamçı husilərə qarşı mübarizədə Yəmən Prezidenti Abda Rabbo Mansur Hadiyə dəstək verir.

 

Paşa ƏMİRCANOV, 
“Xalq qəzeti”

21 2019 10:31 - XƏBƏRLƏR
XƏBƏRLƏR

Köhnə versiyamızdan xəbərləri izlə