Sebastian Sançez: Azərbaycanın milli musiqilərini çox bəyəndim

“Mənim üçün bu Olimpiada çox faydalı oldu. Burada insanların texnologiyaya, onun tətbiqinə maraqlı göstərdiklərini  hiss etdim. Texnologiya dünyasına ayrılan diqqət bilik və bacarıqlarımızı tətbiq  etməyə töhfə verir.”  Bu sözləri Bakıda keçirilən 31-ci Beynəlxalq İnformatika Olimpiadasının bürünc medalçısı Sebastian Sançez müsahibəsində deyib.

S.Sançez əlavə edib: - Azərbaycana medal qazanmaq üçün gəldim və buna nail oldum. Altı ildir proqramlaşdırma ilə məşğul oluram. Buna görə də bu yarışa böyük səylə hazırlaşırdım. Çox istərdim ki, yarışmanın digər iştirakçıları da öz təcrübələrini başqaları ilə bölüşsünlər. İlk dəfə 2012-ci ildə vətənim Mexikoda keçirilən Beynəlxalq İnformatika Olimpiadasında iştirak etmişəm. Bakının bir neçə görməli yerlərində oldum. Ən çox diqqətimi çəkən məkanlar İçərişəhər və Alov qüllələri  oldu. Paytaxtınız çox gözəldir. Burada yeni tikililərlə yanaşı, qədim abidələr də vardır. İnsanlar hər zaman bizimlə mehriban davranırdılar. Azərbaycanın milli musiqilərini dinlədim və çox bəyəndim. Bu, Şərqlə Qərbin bir sintezidir”.

M.MÜKƏRRƏMOĞLU,
“Xalq qəzeti”