Köhnə versiya

Ən son xəbərlər

Son buraxılış
Arxiv

“İmadəddin Nəsimi 650: hürufizm təlimində kamil insan konsepsiyası” adlı ədəbi-bədii tədbir keçirilib

“İmadəddin Nəsimi 650: hürufizm təlimində kamil insan konsepsiyası” adlı ədəbi-bədii tədbir keçirilib

Dövlət Təhlükəsizliyi Xidmətinin (DTX) Heydər Əliyev adına Akademiyasında “İmadəddin Nəsimi 650: hürufizm təlimində kamil insan konsepsiyası” adlı ədəbi-bədii tədbir keçirilib.
DTX-nin İctimai əlaqələr şöbəsindən bildiriblər ki, tədbirdə akademiyanın müəllim-professor və kursant heyəti, Üzeyir Hacıbəyli adına Bakı Musiqi Akademiyasının humanitar fənlər kafedrasının müdiri, filologiya elmləri doktoru, professor Tərlan Quliyev və AMEA-nın akademik Ziya Bünyadov adına Şərqşünaslıq İnstitutunun aparıcı elmi işçisi, filologiya elmləri namizədi, dosent Səadət Şıxıyeva iştirak ediblər. 
Əvvəlcə akademiyanın rəis müavini Elşad Nəsirov Azərbaycan Prezidentinin “Böyük Azərbaycan şairi İmadəddin Nəsiminin 650 illik yubileyinin qeyd edilməsi haqqında” 2018-ci il 15 noyabr tarixli və “Azərbaycan Respublikasında 2019-cu ilin “Nəsimi ili” elan edilməsi haqqında” 2019-cu il 11 yanvar tarixli sərəncamlarını tədbir iştirakçılarının diqqətinə çatdırıb. Sonra videoçarx nümayiş olunub.  
Akademiyanın fakültə rəisi, filologiya elmləri doktoru, professor Cəlal Qasımov İmadəddin Nəsiminin həyatı, milli ədəbiyyatımızda onun yaradıcılığının, fəlsəfi baxışlarının yeri və rolu barədə tədbir iştirakçılarına geniş məlumat verib. 
Professor Tərlan Quliyev İmadəddin Nəsiminin Azərbaycan xalqının ümumbəşər mədəniyyətinə bəxş etdiyi qüdrətli söz ustadlarından, Şərqin zəngin mədəni-mənəvi sərvətləri üzərində ucalmış və bədii söz sənətinin son dərəcə qiymətli incilərini meydana gətirmiş mütəfəkkir şair olduğunu deyib və onun ədəbi irsi barədə danışıb. 
Filologiya elmləri namizədi, dosent Səadət Şıxıyeva Nəsiminin dünya poeziyasının ən kamil nümunələri sırasında diqqətəlayiq yer tutan əsərlərində daim insanın əzəmətini və insani məhəbbəti tərənnüm etdiyini bildirib. Məruzəçi anadilli şeirin humanist ideyalarla daha da zənginləşməsində unudulmaz şairin misilsiz xidmətləri barədə söhbət açıb. 
Kursantların ifasında İmadəddin Nəsiminin qəzəllərinin söylənilməsi və onların şairin məhkəmə səhnəsini canlandırmaları tədbir iştirakçıları tərəfindən böyük maraqla qarşılanıb.

 

AZƏRTAC

17 2019 00:18 - XƏBƏRLƏR
XƏBƏRLƏR

Köhnə versiyamızdan xəbərləri izlə