Köhnə versiya

Ən son xəbərlər

Son buraxılış
Arxiv

Şuşalılara məxsus heyvanlarda profilaktiki peyvəndləmə aparılır

Şuşalılara məxsus heyvanlarda profilaktiki peyvəndləmə aparılır

2019-cu ilin yanvar ayının ilk günlərindən başlayaraq Kənd Təsərrüfatı Nazirliyi yanında Dövlət Baytarlıq Xidmətinin (DBX) Şuşa Rayon Baytarlıq İdarəsi 4 sahə baytarlıq məntəqəsi ilə ölkənin 58 rayon və şəhəri daxil olmaqla 234 yaşayış məntəqəsində məskunlaşmış Şuşalılara məxsus  iribuynuzlu, xırdabuynuzlu heyvan, at, quş və arı ailələrinə baytarlıq xidməti göstərir.

Şuşa Rayon Baytarlıq İdarəsi cari ilin ilk günlərindən başlayaraq bu günə kimi rayon əhalisinə məxsus iribuynuzlu, təkdırnaqlı heyvanlarda, it və xırdabuynuzlu heyvanlarda xəstəliklərə qarşı peyvənd aparıb.

Fevral ayından şuşalılara məxsus iri və xırdabuynuzlu heyvanlar arasında dabaq xəstəliyinə qarşı peyvəndləmə tədbirinə başlanılıb.

Mart ayının ilk günlərindən isə Şuşa Rayon Baytarlıq İdarəsi tərəfindən sahə baytarlıq məntəqələri arasında iribuynuzlu heyvanların iti yoluxucu nodulyar dermatit xəstəliyinə qarşı aparılacaq vaksinin bölgüsü başa çatdırılıb və peyvəndləmə tədbirinə başlanılıb. Ümumiyyətlə, rayonun təsərrüfatlarında heyvanlar arasında aparılan peyvəndləmə tədbirləri “soyuq zəncir” rejiminə riayət olunmaqla həyata keçirilir.

Bundan başqa məlumat üçün bildirək ki, heyvan sahiblərinin şəxsi vəsaiti hesabına epizootik planda nəzərdə tutulmayan iribuynuzlu, xırdabuynuzlu heyvanın və quşların pastrelliyozu, iribuynuzlu heyvanın (cavanların) emkarı, xırdabuynuzlu heyvanın brodzot və enterotoksemiya xəstəliklərinə qarşı, iribuynuzlu heyvanın anayerob enterotoksemiya xəstəliyinə qarşı vaksinasiya aparılıb. Heyvanların və quşların qurd xəstəliklərinə qarşı dərman preparatları sahibkarın hesabına alınaraq heyvanlara verilib.

Qeyd edək ki, şuşalılara məxsus təsərrüfatlarda baytarlıq preparatlarının istifadəsində şəffaflığın təmin edilməsi məqsədilə üzərində “satıla bilməz” yazılmış biopreparatların və dərman maddələrinin heyvanlara təmənnasız tətbiqi barədə heyvan sahibləri ilə söhbətlər və izahat işləri aparılır. Həmçinin tədbirlər çərçivəsində maariflənmə işi aparılaraq həm iti yoluxucu, həm də daxili yoluxmayan xəstəliklər barədə təsərrüfat sahiblərinə ətraflı məlumatlar verilir, təsərrüfatlarda baytarlıq-sanitariya qaydalarına ciddi əməl olunması tövsiyə edilir. Mövsümi xəstəliklərə, o cümlədən qan parazitləri, helmintozlar və dəri üstü parazitlərə qarşı heyvan sahibinin hesabına aparılacaq tədbirlər barədə məsləhətlər, risklər (xəstəliklərin yaranma, ötürülmə, yoluxma, idarə olunma, azaldılma və qarşısının alınması) və yeni yanaşmalar barədə ətraflı məlumatlar verilir. Heyvanlarda bundan sonra da peyvəndləmə tədbirləri davam etdiriləcək.    

Dövlət Baytarlıq Xidməti bildirir ki, rayon (şəhər) baytarlıq idarələri baytarlıq preparatları, lazımi ləvazimat və avadanlıqlarla təmin edilib.

Hazırda xüsusi təhlükəli xəstəliklərə görə  epizootik vəziyyət sabitdir.

 

Z.BƏŞİRQIZI,
“Xalq qəzeti”

10 2019 13:31 - SƏHİYYƏ
SƏHİYYƏ

Köhnə versiyamızdan xəbərləri izlə