Köhnə versiya

Ən son xəbərlər

Son buraxılış
Arxiv

Dünya Bankının missiyasına ölkəmizdəki rifah səviyyəsi ilə bağlı məlumat verilib

Dünya Bankının missiyasına ölkəmizdəki rifah səviyyəsi ilə bağlı məlumat verilib

Azərbaycanda dayanıqlı sosial-iqtisadi inkişaf əhalinin gəlirlərinin, o cümlədən həssas qruplara yönələn sosial ödənişlərin artırılması istiqamətində ardıcıl şəkildə mühüm addımların atılması ilə müşahidə olunur. Bunu əmək və əhalinin sosial müdafiəsi nazirinin müavini Mətin Kərimli Dünya Bankının Azərbaycanda rifah və rifahın paylanması ilə əlaqədar təhlil üzrə missiyası ilə görüşdə vurğulayıb.

Azərbaycan Prezidenti İlham Əliyevin sosialyönümlü siyasətinin nailiyyətlərini diqqətə çatdıran M.Kərimli respublikada iqtisadi artımla bərabər, rifah səviyyəsinin yaxşılaşdırılmasına xidmət edən məqsədyönlü dövlət proqramları nəticəsində ölkədə yoxsulluq və işsizliyin kəskin şəkildə azaldıldığını vurğulayıb. O, ölkədə etibarlı sosial müdafiə sisteminin qurulduğunu, yeni iş yerlərinin yaradılmasının daimi xarakter aldığını, sosial müdafiə siyasətində passiv tədbirlərdən aktiv tədbirlərə keçildiyini deyib.

Əhalinin gəlirlərinin və rifahının artırılmasının Azərbaycan dövlətinin əsas məqsədlərindən olduğunu deyən nazir müavini bu istiqamətdə atılan mühüm addımların davam etdiyini diqqətə çatdırıb. M.Kərimli buna misal olaraq, Azərbaycan Prezidenti İlham Əliyevin bu il sosial sahə ilə bağlı bir sıra fərman və sərəncamlar imzaladığını qeyd edib. O bildirib ki, bu sənədlər birdəfəlik ödəmə verilən şəhid vərəsələrinin əhatə dairəsinin genişlənməsinə, həssas qruplar üçün dövlət büdcəsi hesabına mənzil tikintisinin güclənməsinə, şəhid ailələrinə ödənilən Prezident təqaüdlərinin, 1,3 milyon nəfəri əhatə edən pensiyaçıların 94 faizinin pensiyasının, 600 mindən çox işçinin əmək haqqının artımına imkan verib. M.Kərimli aztəminatlı ailələrin dövlətin sosial yardım proqramı ilə əhatə olunduqlarını, bununla bərabər bu kateqoriyadan olan ailələrin kiçik biznesə çıxışınına imkan verən özünməşğulluq proqramının əhatə dairəsinin 6,5 dəfə genişləndiyini, son bir ildə bu proqrama 7,3 minədək ailənin cəlb edildiyini deyib.

Dünya Bankı ilə ötən dövrdə uğurlu əməkdaşlıq təcrübəsinin formalaşdığını qeyd edən nazir müavini Azərbaycanda rifah və rifahın paylanması ilə bağlı təhlil üzrə missiyanın iqtisadi və sosial rifahın monitorinqi sahəsində fəaliyyətinin önəmini qeyd edib. O, aparılan araşdırmanın nəticələrinin müvafiq siyasi və praktik iş müstəvisində nəzərə alınacağını deyib.

Missiyanın üzvləri ölkəmizdə aparılan siyasətdə rifah amilinin ön planda saxlanmasının, sosial ödənişlərin artırılmasının, ümumən əhali gəlirlərinin artımına yönələn tədbirlərin təqdirəlayiq olduğunu bildiriblər.

Görüşdə missiyanın Azərbaycanda rifah və rifahın paylanması ilə əlaqədar araşdırmalarının nəticələri müzakirə olunub, yoxsulluğun qiymətləndirilməsi metodologiyasının təkmilləşdirilməsinə,  ölkəmizdə sosial sahədə aparılan islahatlara dair fikir mübadiləsi aparılıb.

 

Z.BƏŞİRQIZI,
“Xalq qəzeti”

13 2019 12:41 - İQTİSADİYYAT
İQTİSADİYYAT
13 İyul 2019 | 17:10
Həftəsonu neftin qiyməti

Köhnə versiyamızdan xəbərləri izlə